Юйюр – тин-ниет юйретиуню мудору

Къабарты-Малкъарны Муслийманларыны дин управлениялары Минги тауда «Юйюр – тин-ниет жаны бла юйретиуню мурдору» деген форумну бардыргъанды. Аны чегинде эллиден аслам сабийге юйюрде ара къалай болургъа кереклиси ангылатылгъанды, алагъа Парламентни депутатлары, жамауат ишчиле бла тюбешиуле да къуралгъандыла.

Быйыл Россейни Президентини оноуу бла юйюрню жылыды, форум да юйюр тин-ниет байлыкъланы сакълаугъа аталгъанды. Управленияны башчысыны орунбасары Алим Сижажев айтханыча, ала бу иш бла он жылны кюрешедиле. «Эндиге дери ишлеген жаш адамла бла тенглешдиргенде, бусагъатдагъыла юйюрню ичинде халлагъа, юйюр жашаугъа уллу кёлю тюйюлдюле. Алгъадагъы тёлюле бла ушакъ башларгъа, байламлыкъла тохташырыргъа къыйыныракъ болгъанды. Бюгюн бу жаны бла чырмау жокъду, жангызда сабийлеге ала юлгю алырча инсанла керекдиле. Жаш тёлю бла ишлерге тийишли органла анга эс бурсала, ала тюз жолну сайларларына, тамблагъы кюнюбюз а огъурлу болуруна ишексизме», - дегенди ол.

Форумда сабийлени халлерин тинтиуге да къаралгъанды. Сёз ючюн, ала кеслерини иги эм осал жанларын суратларгъа керек эдиле. Артда уа тренерле ала бла ушакъ этгендиле. Быллай амалланы хайырындан, сабийле ич дунияларын, къайгъыларын ачыкълаяладыла, керек болса, болушлукъ да табаладыла. Форумну тренери Джамиля Безирова эс бургъаныча, бусагъатдагъы жашауда  ата-анала, сабийлерин затдан керекли этмейбиз деп, къадалып ишлеген болумлада  балалары неге жарсыгъанларын, аланы тынчлыкъларын не алгъанын бир кесек бир жанында къойгъанчадыла. Быллай тренингледе сабийле, тенглерине да тынгылай, кеслерини жарсыуларын айтадыла, жюреклери ырахат болады.