Кеслери иш къурап къармашханланы саны кёбейгенди

Федерал налог службаны тинтиулерине кёре, Къабарты-Малкъарда кеслери иш къурап къармашханланы саны бу айны биринчисине 80,8 мингнге жетгенди. аладан 78,4 минги инсанладыла, къалгъан кесеги уа энчи предпринимательледиле, дегендиле КъМР-ни «Мени бизнесим» арасында.

Бизни къыралда ишни бу халда бардырыргъа эркинлик 2020 жылда берилгенди. Республикада ол кезиуде «Профессионал файда тюшюргенлеге налог» салыу кийирилген эди. Ол жылны ахырына дери анга минг бла жарым инсан кёчгенди. Саулай алып тергегенде уа, бу тёрт жылны ичинде кеслери иш къурап къармашханла Къабарты-Малкъарны бюджетине 201,7 миллион сом налог тёлегендиле.

Быллай иги ёсюм болгъанын кёп затдан кёредиле арада: кеслери иш къурап къармашханлагъа къырал мюлк эмда ырысхы жаны бла себеплик этеди, консультацияла эмда билим береди. Ишлерин бу халда бардыргъанланы арасында такси, жюк ташыу, ремонт этиу, маркетинг жумушла бериу, репетиторство, фатарны ортакъгъа бериу бла кюрешгенле кёпдюле. Аланы орта жыл санлары отуз бла бешди.

Эсге сала айтсакъ, бу къауумгъа къыралны жанындан себеплик «Гитче эмда орта предпринимательство, сора энчи предпринимательство башламчылыкъгъа себеплик этиу» программаны чеклеринде бериледи.