Юйрениуле ётгендиле

Нальчикде «Дея» сатыу-алыу арада МЧС-ни от тюшюуге къажау-къутхарыу юйрениулери бардырылгъандыла. Ала эрттенликде сагъат сегизде башланнгандыла. Таурухха кёре, араны ючюнчю къатысында кинотеатр, оюн автоматла эм ашханала тийресинде тюкенледен бирине от тюшгенди. Аны юсюнден билдириу диспетчерге жетип, от ёчюлтюучюле мычымай ары тебирегендиле.

Ведомствону регионда бёлюмюню 1-чи номерли от ёчюлтюу-къутхарыу отрядыны башчысы Арсен Суйдимов айтханыча, жалгъан халда эки жюз алтмыш беш квадрат метр жерни алгъанд. Аны ёчюлтюуде сегиз уллу эмда тёрт энчи улоу хайырланылгъанды. Быллай юйрениулени баш мураты

энчи составны къыйын болумгъа хазырлыгъын тинтиудю эм къарыусуз жерлерин ачыкълауду.

Алай бла араны администрациясы адамланы къоркъуусуз жерге чыгъаргъанды.  Болсада къутхарыучула дагъыда мекямда къалгъан ючеуленни тапхандыла. Низамгъа кёре ала ачыгъанланы къоркъуусуз жерге элтгендиле, отну да ёчюлтгендиле.

Нальчикни 1-чи номерли от ёчюлтюу-къутхарыу бёлюмюню башчысыны орунбасары  Амурбек Органоков ангылатханыча, от ёчюлтюу штаб хар жерде къуралмайды. Бёлюмню башчысыны оноуу бла ол, къыйын болум экинчи эм андан бийик къауумгъа кире эсе, ачылады. Аны борчу, отну ёчюлтгенде, къутхарыучуланы ишлерин эсепде тутууду, алагъа билдириулени заманында жетдириудю, кючлени керек жерлеге жибериудю. Сор, ол терк медицина болушлукъ этиу служба, ич ишле министерство бла байламлыкъда турургъа тийишлиди.

Юйрениуле уа жетишимли бошалгъандыла. Къутхарыучула бийик усталыкъларын, хазырлылыкъларын да кёргюзтгендиле. Быллай юйрениуле, адамла аслам жыйылгъан башха жерледе да къоркъуусузлукъну сакъларча, дайым къуралгъанлай турлукъдула.