Тазирле ёсерикдиле

РФ-ни Къырал Думасы бу кюнледе этген оноугъа тийишлиликде  жоллада жюрюуде жорукълагъа (ПДД) бузукълукъ этилгени ючюн салыннган тазирле келир жылда уллуракъ боллукъдула. Аны юсюнден Думаны сайтында (http://duma.gov.ru/news/60568/) жазылады.

Аны бла бирге тазир заманында (20 кюнню ичинде) тёленнгени ючюн ол экиден бирине азайгъан жорукъ да кетерилгенди. Аны орунуна энди жаланда тёртден бирине къысхартырыкъдыла. Алай шёндюча 20 кюн угъай, 30 кюн берилликди ол амалны хайырланып тёлерге сюйгенлеге.

Тазирле дегенде, аланы кёплери тюрленнгендиле. Сёз ючюн, бел бауну къысмай баргъаннга ол минг сом угъай, минг бла жарым боллукъду, «къызыл светофоргъа» ётген да аллай бир тёлерикди. Экинчи бузукълукъну къайтарып этген инсанны бохчасы 7,5 минг сомгъа женгил боллукъду, эсирип руль артына олтургъан а 30 мингни орунуна 45 минг сом тёлерикди.

Терк баргъанланы да унутмагъандыла: мында тазирле 750 сомдан башланып, 7,5 мингнге дери жетедиле. Сёз ючюн, шёндю ол 500-5000 минг сомду. Жолну терс жанына чыкъгъанла, трамвайны ызларына неда жол жанлагъа киргенле, белгилени эмда ызланы сансыз этгенле, эсирген ишекликге тюшюп, медицина къарауну ётерге унамагъанла да алгъадан эсе кёп тёлерикдиле. Жарамагъан жерледе тохтагъанла бюгюнлюкде минг бла жарым берирге керек эселе, келир жылда 2250 сомдан къуру къаллыкъдыла. Аллындан келгеннге жол бермегенле (ПДД-ны излеми алай болгъанда), жолда улоугъа тийишли жерни тутмай баргъанла, жол жанлагъа чыкъгъанла, транспорт неда адам къауум тизилип баргъанда орталары бла ётгенде неда ичлеринде тохтагъанда да тазирни ёлчеми аллай боллукъду.