Жангыртылгъан мектепни жокълагъандыла

Барыбыз да билгенликден, арт заманда республиканы жер-жерлеринде жангы мектепле, сабий садла ишленедиле, эскилери уа тынгылы жангыртыладыла. Бу жумушла асламысында «Билим бериу» миллет проектни жашауда бардырыу бла байламлы этиледиле.

Бу кюнледе Кишпек элни ол программагъа тийишлиликде жангыртылгъан битеулю билим берген мектебинде уа КъМР-ни жарыкъландырыу эмда илму министри Анзор Езаов болгъанды. Ол школгъа жети айны ичинде этилген тынгылы ремонтдан сора аны энди къалай жангыртылгъанын, ишлегенин да кёргенди. Бу мектепни мекямы хайырланыргъа эм алгъа озгъан ёмюрню алтмышынчы жылында берилген эди да, арт заманда анга тынгылы ремонт этилирге иги да керек болуп тура эди. Аны себепли уа энди «Билим бериу» проектни себебинден школну кёрюмдюсю ахшы жанына тюрленнгенди.

Билим бериу махкемеге бир жолгъа алты жюз адам сыйынады. Жангыртыу, ремонт ишлени кезиуюнде эски мектепден жаланда аны тёнгеги къалгъан эди, бирси затлары барысы да жангыдан этилгендиле.

Андан сора да, школгъа жангы мебель, окъуу оборудование берилгендиле. Дагъыда мекямны башы жангыдан жабылгъанды, тыш къабыргъаларын да омакъ тышлагъандыла. Ашханада керекли оборудование да толусунлай алышындырылгъанды.

Билим бериу махкемеде сабийлени къоркъуусузлукъларын жалчытыуну игилендирир ючюн, мында шёндюгюлю видеосистемала бла от тюшюуню билдирген сигнализация да орнатылгъандыла. Мектепни тийреси да тапландырылгъанды.

Жууаплы министерстводан келген келечиле окъуу класслагъа да къарап, устазла бла да ушакълашхандыла, школда бюгюнлюкде болумну жаратханларын айтхандыла. Аны бла бирге уа федерал программаны жашауда бардырыугъа жууаплы кёзден къарагъанлары ючюн ыспас этгендиле эмда мында билим алгъан жашла бла къызла окъууда, чыгъармачылыкъда да бийик жетишимле болдурурларына ышаннганларын билдиргендиле.