Суратларыгъызны сакълайбыз

Багъалы газет окъуучуларыбыз! Биз озгъан жыллада бардырылгъан  конкурсларыбызны биягъы ачабыз. Нек? Таулу халкъ ариу халкъды, адамларыбыз газет бетледе кёбюрек болсала сюебиз. Жаланда къызладан бла сабийледен къалгъанла уа, деп сорлукълагъа жууап: хурметли аппаларыбыз, ынналарыбыз, аталарыбыз – аналарыбыз бла байламлы материалла боллукъдула. Хар биригиз юйюрде сыйлы адамыны юсюнден жазгъанны бек сюйюп басмаларыкъбыз.

Бусагъатда уа хар юйюрню жарытхан ариу къызланы  сурат конкурсун башлайбыз.  Быйыл декабрьден  башлап, Аллах айтса, 2025 жылны декабринде  «Таулу къыз» конкурсну эсеплерин чыгъарыкъбыз. Къысха хапар толу болургъа боллукъду – болады алай да, къысхалыкъ фахмуну эгечи болгъаны эрттеден белгилиди. Къайда окъуйду, мураты, жарыкъ умутлары не бла байламлыдыла, халкъыбызны тарыхына сейири бармыды, ашха – суугъа, адамны кийимине къалай къарайды, юйюрюне, жууукъларына – тенглерине ниети, адамларына сакълыгъы – жазыгъыз хар затны да.

Ариу къызларыбызны суратларын къысха хапарчыкъ бла бирге жиберигизни тилейбиз: къайда туугъандыла,  къайсы элде, шахарда жашайдыла, къайсы окъуу юйде билим аладыла неда ишлейдиле.

Дагъыда газетде «Топалайчыкъ» деген рубрикада сабий суратла басмаланадыла. Ол эришиу тюйюлдю, алай бек сейирлик рубрикады.

Дагъыда бир зат: ол да конкурс тюйюлдю, алай дагъыда бир сурат рубрикабыз барды -  «Эски сурат». Жиберигиз бизге юйде эски суратларыгъызны.  Жаннетли болсунла, жазыгъыз дунияларын алышхан адамларыгъызны юсюнден. Жашауда биз барыбыз да бир жумушну къолгъа алып тамамламасакъ эди, дуния оюлуп кетер эди. Къурулушчу, ётмек бишириучю, орам сыйпаучу, устаз, медсестра, журналист, къалауур, врач неда къайсы ишде уруннгандыла сизни адамларыгъыз? Аны юсюнден айтыгъыз да, сураты бла бирге электрон адресибизге жиберигиз: elbor_50@mail.ru.  Бу адресни «Заман» газетни хар номерини тёртюнчю бетинде табарыкъсыз.  Жууукъларыгъыздан сора да, Азия бла байламлы  суратланы да   жиберигиз. Ала тарыхыбызны шагъатлыкъларыдыла.

Багъалы газет окъуучула! Къайтарып айтабыз: «Заман»  халкъыбызны жашаууну кюзгюсю болуруна итинебиз.  Газетге жазылыгъыз эм «Таулу къыз» эришиуге къатышыгъыз, «Эски сурат» рубрикалагъа да эс буругъуз.