Жамауатдан да сакълыкъ изленеди

Къабарты-Малкъарда «Къоркъуусуз эмда тынгылы автомобиль  жолла» миллет проектге кёре" жолла мардалагъа келиширча аслам иш этиледи. Ол санда светофорла, жорукъланы билдирген белгиле бла ызла салынадыла  эм сабийле кеслерин жолда тап жюрюртюрча ангылатыу иш бардырылады,- деп билдириледи КъМР-ни Транспорт эмда жол мюлк министерствосуну пресс-службасындан.

Проект ишлеген заманны ичинде, алты жылгъа республикада жолланы 375 километринде кече жарытырча мадар этилгенди. Ол санда  быйылны ахырына тийишли жумушла  энтта да 75 километрде тамамланыллыкъдыла.

Сагъынылгъан кезиуде 18,5 километрде къоркъуусузлукъну жалчытырча   темир буруула тартылгъандыла. Дагъыда 240  километрде жорукъланы билдирген ыз бла  1700 белги салыннгандыла.

Андан сора да, социал магъаналы объектлени алларында 56 «зебра» эм жаяу жолчукъладан   21 километри  ишленнгендиле. Дагъыда кече жол жанлары кёрюнюрча  жылтырауукъ затла   жарашдырылгъандыла.  

Бюгюнлюкде  Къабарты-Малкъарны жолларында видеогъа эм суратха тюшюрген  камерала да иги кесек бардыла эм жыл сайын алагъа къошула барады.  Жаш тёлю жолда жорукълагъа  уллу кёллю болмаз ючюн  ангылатыу  иш тири   бардырылады.

  Айтылгъан ишле жолда къоркъуусузлукъну жалчытыргъа себеплик этедиле, болсада жамауат кеси   сакъ болургъа  юйренсе, жоллада  болум бютюн иги жанына тюрленириги баямды.