Энчи сабийчиклени кёллерин жаратхандыла

3 декабрьде битеу дунияда да Сакъатланы халкъла аралы кюню белгиленеди. Ол саулукъларына кёре чекленнген онглары болгъан адамланы къайгъыларына эс бурур, алагъа чырмаусуз жашау болумла къурар мурат бла кийирилгенди. Бу кюнде инсанланы бу къауумларын жамауат жашаугъа сингдириуде бурулгъан тюрлю-тюрлю жумушла бардырыладыла.

«Радуга» сабий социал-реабилитация арада бу байрамны чеклеринде  жыйылыу бардырылгъанды. Анга КъМР-ни Парламентини башчысы Татьяна Егорова бла депутатла къатышхандыла.

Жыйылгъанланы аллында сёлеше, Татьяна Борисовна ала къыйын жашау болумгъа тюшгенлерине да къарамай, тёзюмлюкню, сабырлыкъны юлгюсюн кёргюзтгенлерин, аны бла бирге уа къарыулу, кючлю болгъанларын белгилегенди.

 -  Къыйын болгъанлыкъгъа, окъууда, спортда, чыгъармачылыкъда жетишимле болдурасыз, тёгерекде адамлагъа жашаугъа сюймекликге юйретесиз. Бу ышанларыгъыз ючюн сизге хурметлик этиледи. Бюгюнлюкде къыралда саулукъларына кёре чекленнген онглары болгъанлагъа жашауларын женгиллетир ючюн тийишли мадарла этиледиле. Социал, билим бериу, саулукъ сакълау, информация жаны бла система къуралгъанды. Бу магъаналы иш кенгертилгенлей барады. Анга инсанларыбыз къатышырыкъларына бек ышанама,-дегенди спикер.

Татьяна Егорова ата-аналагъа, энчи сабийчиклени къайгъыларын кёрген хар инсаннга да ыразылыгъын билдиргенди. Ала къыйын жашау болумгъа тюшгенлени жашаулары жарыкъ болур ючюн къолдан келгенни этгенлерин чертип, ала тамамлагъан иш артыкъда багъалы болгъанын айтханды.

Жыйылгъанлагъа концерт къуралгъанды. Сахнагъа сабий чыгъармачылыкъ коллективле чыгъып, фахмулары бла ингирге къууат бергендиле.