Ана тил - миллетни жаны

Кёп болмай Огъары Малкъарда "Ана тилим - жаным, дуниям" деген республикалы  конкурс-фестивальны кесеги ётгенди.  Ачыкъ дерсни малкъар тилден устазла  бардыргъандыла,  деп билдириледи   Черек районну пресс-службасындан. 

Анга хазырланыу иги да алгъада башланнганды. Фестивальны къураргъа ата-анала, ыннала бла аппала эм башхала да болушхандыла. Жараула баргъан кезиуде сабийле миллет тепсеуле, кийимле, азыкъла, адет-тёре бла да толу шагъырейленнгендиле.
Байрам таулулада жюрюй келгенича,  къонакълагъа жарыкъ тюбеуден   башланнганды. Чыгъармачылыкъ ишлени, тиширыула бла эркегырыу кийимлени, таулула кюн сайын хайырланнган аберилени   кёрмючю да ётгенди.

Школчуланы   миллет тепсеуледен, жырладан эм оюнладан къуралгъан номерлери да къараучуланы кёллерине жетмей къалмагъанды.   
 

Эсге сала айтсакъ, конкурс жыл сайын КъМР-ни Жарыкъландырыу, илму эмда жаш тёлюню ишлери жаны бла министерствону билеклиги бла бардырылады. Аны магъанасы Къабарты-Малкъарда жашагъан миллетлени  ана тиллери бла адабиятларыны даражасын ёсдюрюргеди.