Ток бла ишлеген машина жолда къалмазча

Къабарты-Малкъарны туристле аслам жокълагъан жерлеринде   электрокюч бла ишлеген машиналгъа  ток берирча  станцияла (ЭЗС) салынырыкъдыла. Бюгюнлюкде аллай  «электрозаправка» Элбрусда, Огъары Чирик кёлледе эм Нальчикде да барды. Саулай алып айтханда, республикада аланы жыйырма  чакълысы ишлейди.

- Быллай станцияла, эм биринчиден,  туристлеге тап болурча жерледе жарашдырыладыла. Сёз ючюн, Азау талада юч станция окъуна ишлейди. Ол себепден водительле бир бирни кёп заманны сакъларгъа  тюшерик тюйюлдюле. Огъары Чирик кёлде да алыкъа  болгъаны сурамны толтурурчады.  

Андан сора да, быллай станцияла федерал жоллада да болургъа керекдиле. Ол себепден  болгъанларына энтта да къошарча мадар этилликди, - дегенди промышленность, энергетика эмда  сатыу-алыу министрни болушлукъчусу Алим Тохов.

Ол айтханнга кёре,  бусагъатда станцияланы кёбюсю Нальчикде уллу сатыу-алыу араланы къатларында орналадыла.  Андан сора да,   Нарткъала эм  Прохладный  шахарлада да станцияла бардыла. 

 Къабарты-Малкъарда кёбюсюнде  150 киловатт берген гитче станцияладыла. Орта эсеп бла алып айтханда, машина 80-90 процент чакълы зарядка алырча 15-30  минут сакъларгъа тюшерикди. Ол иги кёрюмдюге саналады. Республикада бир къауум  кючлюрек станция да барды, алада заман бютюн аз къоратылады. Ала туризм кластерледе  эм уллу тюкенлени алларында ишленнгендиле.   

Министрни болушлукъчусу билдиргенича, быйылны башындан бери республикада 21 ток берген  заправка ишлейди. Жылны ахырына дери энтта да  инвестор алып,   тёрт станция хайырланыргъа берилликди.

Ток берген станция салам деген  предпринимательге къыралны жанындан болушлукъ тапдырылады. Ол санда инвесторлагъа ишлерин башларгъа- оборудование алыргъа эм аны ток изгъа къошарча да  регионну Помышленность, энергетика эмда сатыу-алыу министерствосундан субсидия бёлюнеди.