Къытлыкъ шошайыргъа боллукъду

Озгъан айда Къабарты-Малкъарда инфляция 7,5 процент болгъанды. Россейни Банкыны республикада бёлюмюнден билдиргенлерине кёре, ол  саулай къыралда эмда СКФО-да кёрюмдюледен азды. Болум алай былтыр ноябрьден бери сакъланады.

Багъала дегенде, бир-бир затлагъа ала, сёз ючюн, бананлагъа  азая барадыла. Алай энди уа сатыучуланы къоранчлары ёсюп башлагъаны ючюн  ала да тохташыракъ болгъандыла. Апельсинле, кертмеле, лимонла да кёбюрек туруп башлагъандыла. Нек дегенде  продукцияны сатып-алыргъа, келтирирге, тутаргъа кёбюрек къоратыргъа тюшеди.

Театрлагъа билетлени багъаларына  уа иги къошхандыла. Аны сылтауу – иш хакълагъа бла мекямланы жумушларын жалчытыугъа къоранчла кёбейгендиле.

Алтын багъа болгъаны ючюн, андан этилген затланы (жюзюклени) багъалары да ёсгенди. Быллай производстволаны къоранчлары кёбейгенин да белгилейдиле банкда.

Аякъ кийимлени багъалары, озгъан жыл бла тенглешдиргенде, бираз тюшгендиле, алай ол тюрлениу да алгъынча алай тири болмайды. Аны сылтауун импорт азайгъанында эмда кесибизде предприятияланы къоранчлары ёсгенинде кёрюрге боллукъду.

Финанс учрежденияны тергеулерине кёре, келир жылда Россейде инфляция азайып, 4,5-5 процент, 2026 жылда уа 4 процент болургъа боллукъду. Андан арысында алайлай турлукъду.