Ауур жюкле ташыгъанлагъа да жорукъла къатыланадыла

Жангы жолла ишлеу, эскилеге ремонт этиу, аланы тап халда тутуу – ала  барысы  да жолчуланы  борчларыдыла. Тергеулеге кёре, бизни къыралны регионларында ауур жюклени ташыу жылдан-жылгъа кёбейе барады. Быллай транспорт кёп тюрлю товарланы, продукцияны, къурулуш эмда башха  материалланы кёп  тюрлюлерин ташыйдыла.

Болум тюрлене баргъанын бизни республика да сезеди. Къоншу регионладан Къабарты-Малкъаргъа эмда аны ичи бла башха жерлеге кёп улоу жюрюйдю. Ала артыгъы бла жюкленип болсала уа,  жоллагъа хата жетеди. Терк районда ишлене тургъан автоматика базманны хайырындан а ол къоркъуу энди азыракъ болур деген ышаныу барды.

Бу базман боллукъ пункт «Прохладный - Эльхотово» трассада, Шимал Осетия бла чекни къатында ишлене турады. Аны къурулушу «Къоркъуусуз эмда  тынгылы жолла» миллет проектни чеклеринде барады. Базман жолну тюбюнде орнатыллыкъды, ол дагъыда улоуланы уллу эмда гитче болгъанларын  тергеп турлукъду.

Республиканы Транспорт эмда жол мюлк министерствосунда айтханларына кёре, энчи алайда пункт салыу  бошдан  тюйюлдю: алайы бла кюн сайын Чеченден, Ингушетиядан, Гюржюден къадар улоу ётеди. Аланы саны жети мингнге окъуна жетеди бирде, экиден бири уа ауур жюкле ташыгъан машиналадыла. «Бу пункт а аланы ауурлукъларын тыймай, кеси аллына тергеп турлукъду. Аны хайырындан жолла да сакъланырыкъдыла», - дегенди министерствону келечиси Мурачаланы Иман.

Бу кюнледе ишчиле анда оборудованияны орнатырча жерни хазырлай турадыла. Ала жолну жанларын тап этедиле, мурдорун кючлендиредиле, асфальт жаядыла. Хар нени да къысха заманны ичинде бошап, пунктну келир айда ишлетип башларгъа дейдиле. «Бу участкада темирден буруула да саллыкъбыз, улоула базманны жаны бла къутулуп кеталмазча», - дегенди «Урван ДРСУ»-ну баш инженери Аслан Мамухов.

Улоуну мардасындан оздуруп жюклегенлеге  тазир сакълынырыкъды. Аны ёлчеми 10 минг сомдан башланады, бирде 400 мингнге окъуна жетерге боллукъду.