Мураты – Къайсынны юсюнден кино алдырыргъады

Алгъаракълада Калининград областьда  «Шум Блогинг и производство»  деген  ат бла  Битеуроссей билим бериу  жаш тёлю форум ётгенди.  Быйыл ол тёрт энчи  урум бла бардырылгъанды.  Республикадан анга КъМКъУ-ну медицина факультетини студенти Къулийланы Аслан къатышханды эмда грант къоллу болгъанды. Алгъан ахчасына, ол  «Мамырлыкъ эмда къууанч сизге, саула» деген ат бла документли фильм алыр мурат этеди. Аны фильми белгили поэт  Къулийланы Къайсынны жашаууна эмда чыгъармачылыкъ жолуна  жораланырыкъды.

 «Былайда чертип айтыргъа сюеме, мени хорламымы юсюнден къууанчлы билдириу  поэт туугъанлы 107 жыллыгъыны кюнюнде келгенди. Дагъыда мен ийнанама, бу проект жаш тёлюню  ахшы адет=тёрелерибизни сакъларгъа да себеплик этерикди»,-дегеди Аслан.

Ол айтханнга кёре,  проект онтёртден башлап отуз беш жылларына дери  жетгенледен  700 жаш адамны  бирикдирликди, аны санына школчула, бийик окъуу юйлени студентлери, колледжлени окъуучулары, поэзияны сюйгенле да къошуллукъдула. Аны себепли, Къулийланы Къайсынны чыгъармачылыгъын сюйгенлени барын да бу ишге къатышыргъа, алай бла аны юсюнден  кёп билирге чакъырады.