«Сайлауума сокъуранмайма: республиканы, туугъан журтуму ырахатлыгъын сакъларгъа хазырма»

Полицияны участка уполномоченныйлери халкъгъа эм жууукъдула дерге боллукъду: хар орамда, юйде, ол угъай, фатарда кимле жашагъанларын, не бла кюрешгенин окъуна биледиле дерчады. Къоншуда бир  къаугъа болса, машинаны чархын ким эсе да тешсе, аны къой, хауле итле жайылсала да, бек алгъа кимге тарыгъабыз? Полицияны участка уполномоченныйине.

Жашагъан жерибизде барыбыз да таный да болмазбыз участковыйлени, болсада ала толтургъан жумушланы магъаналары аны ючюн  гитче  болмайдыла.  Алай бла бюгюн полициячыланы бу къаууму къаллай борчла толтургъанларын, ишчи кюнлери къалай къуралгъанын ачыкъларгъа кюреширикбиз.  Бу ишде уа бизге Россейни МВД-сыны Элбрус районда бёлюмюню участка уполномоченныйи, полицияны капитаны Темуккуланы Кемалны жашы Азамат болушурукъду.
Ол ич ишле органлада къуллукъ этгенли 14 жылдан аслам болады, уголовный розыскда, къырал автоинспекцияда да ишлегенди.  Ахыр юч жылда уа  полицияны участка уполномоченныйиди. 

- Ишибизде адамланы аманлыкъчыладан сакълау, аланы праволу  излемлерин жалчытыу баш магъаналы борчларыбыздыла.  Аны бла бирге санга буюрулгъан  участканы толусунлай билирге, анда жашагъанланы таныргъа, жер-жерли власть органла эм организацияла бар эселе, ала бла бирге ишлерге керекди. Мен акъыл этгенден, полицияда участка уполномоченныйлени бёлюмю артыкъда магъаналыды, нек дегенде биз кёп тюрлю жумушла толтурабыз: аманлыкъланы болдурмаудан башлап инсанлагъа болушуу,  бузукъчуланы ачыкълаугъа себеплик этиуге дери. Адамланы соруулары уа кёпдюле: жашау турмушдан  башлап социал магъаналы жумушлагъа дери, - дейди Азамат.

Жууаплы борчла 

«Не бла кюрешеди, отоуда олтуруп, компьютерге къарагъандан башха», дегенле да болурла. Ол терс оюмду. Хар эрттенликде аны жууаплылыгъында болгъан административ участкада  айланып чыгъаргъа, болумгъа къараргъа борчлуду. Кюнден-кюннге!

 - Право низамны сакълаучу органлада, профилактика эсепде тургъанла да бардыла. Дагъыда къыйын жашау болумгъа тюшген юйюрледе ёсген сабийлени эркинликлерине бузукълукъ этилмезине къайгъырабыз. Аманлыкъланы жолларын кесиу  жаны бла уллу иш толтурулады. Къысха айтханда, биз инсанла бла биргебиз, - дейди Азамат.

 Аны  жууаплылыгъында болгъан  участка уа гитче тюйюлдю – анга 2,5 мингден аслам адам киреди, сатыу-алыу жерле, предприятияла, административ мекямла да бардыла. 

- Мында къуллукъ этип башлагъанлы юч ай тенгли болады. Бек алгъа адамла бла танышханма. Аланы араларында пенсиячыла, къыйын жашау болумгъа тюшген, профилактика эсепде тургъан юйюрле, ичерге сюйгенле да бардыла.  Бирин къалмай  таныйма десем, семиртип айтырыкъма, алай асламысын а билеме,-дейди ол.  

Адамла бла ишлеген тынч  тюйюлдю, бютюнда уа сен право низамны келечиси эсенг. Къатыбызда терсликлеге къатышханла, сюд этилгенле, халларына кёре къыйын адамла да бардыла. Биз аланы кёрмегенча этип, къатлары бла ётюп кетерге эркинбиз, алай  полициячы  аланы жюреклерине  жол табаргъа керекди. 

«Хар адам да кесича энчиди, - дейди Азамат. - Бир жанындан, психолог болургъа керексе. Халин, ниетин сезерге, аны бла бирге уа къайда ишлегенин, къолайлыгъын, сейирлерин билесе. Ма алай, аз-аздан таный, аны жюрегине ачхычла табаса. Артда аллай адам бла ишлеген да женгилирекди»,-дейди ушакъ нёгерибиз.

Быллай иш а хайыр келтирмей къоймайды. Азамат жууаплы административ участкада жашагъанла анга ышанадыла. Анга уа тилеклери, соруулары бла келгенле кёп болгъаны  шагъатлыкъ этеди.  

- Адамла санга ийнанырларын сюе эсенг, тюзлюк жанлы болургъа, къуллугъунгу, борчларынгы тийишлисича толтурургъа керексе. Ансыз адамла бла байламлыкъла къураяллыкъ тюйюлсе. Барысы да полициячыланы сюедиле дерча тюйюлдю. Алай ол халны   тюрлендирирге  онг барды – законну  башчылыкъгъа алып, кертилик бла ишлесенг.  Сёз ючюн, аманлыкъ этгени  ючюн тутулуп, эркин болгъанла бардыла участкамда. Алагъа жашаугъа къайтхан къыйынды, аны ючюн ишге кирирге болушургъа кюрешебиз, ала жамауат жашаугъа сингип, аманлыкъчылыкъгъа къайтмаз ючюн, - дейди ол.

Хайырлы  ушакъла

Бюгюнлюкде хыйлачылыкъ бютюн бек жайылгъанды. Аны профилактикасы да участка уполномоченныйлени жууаплылыгъындады. Темуккуланы Азаматны айтханына кёре, шёндюгю технологияланы хайырланып этилген хыйлачылыкъланы ангылатыу иш хар кюн да толтурулады. Полициячыла юй сайын барып, адамла бла сёлешип, аманлыкъчыла хайырланнган  амаллагъа  тюшюндюредиле.

- Аланы ауларына бютюнда тамата тёлю кёп тюшедиле, ол себепден участкада абаданлагъа барабыз, сёлешебиз, аманлыкъланы тюрлюлюклерини юслеринден китапчыкъла беребиз.   Ангылатыу иш хайыр келтиргенди дерге боллукъду, мен жууаплы участкада аманлыкъланы ётюрюклерине тюшген жокъду, - дейди Азамат.

Нек сайлагъанды?

Право низамны сакълау ишге  Азамат сюйюп, билип келгенди. Ич ишле органлада къуллукъ этген жууукъ адамларыны кертиликлерине, низамлыкъларына, алагъа этилген хурметге къарап, кеси да алагъа ушаргъа кёлленнгенди.  

- Мен ёсген районда ол кезиуде наркоманла, бузукъчула, аманлыкъчыла бек кёп болгъандыла. Республиканы, туугъан журтуму аллай осал ишледен сакъларгъа, тазаларгъа сюйгенме. Аны ючюн бу усталыкъны билип айыргъанма,-дейди ол.
Сабийлигини сайлауу тюз болгъанын а ол бюгюн, къуллукъ этгенли 14 жыл озгъандан сора, ишексиз айтады. 

Усталыкъны сайлауну жолунда болгъан жаш адамланы  да Азамат право низамда къуллукъ этерге чакъырады. Хар эр киши да Ата журтун къорууларгъа, жамауатны бузукълукъладан, аманлыкъладан сакъларгъа борчлуду»,- дейди.  

- Право низамны сакълау сыйлы ишди. Бюгюнлюкде, энчи аскер операция баргъан кезиуде, анга бютюнда тюшюнесе.  Полицияда   къуллукъ этиу право низамны, законлукъну сакълау бла байламлыды. Аны бла бирге уа  адамланы къайгъыларын ангыларгъа,  жарсый билирге да керексе. Участка уполномоченный а ич ишле органланы бетин чыгъарады. Ол себепден тыш сыфатынг да таза болургъа керекди: адамланы аллына чайыр чайнай чыкъсанг, къаллай хурметни, ышаныулукъну сакълайса, - дейди ол.

Биз Азамат бла Россейде Полицияны участка уполномоченныйини  кюнюню аллында тюбеген эдик да, ол газетни юсю бла ишчи нёгерлерин профессионал байрам бла алгъышлагъанды: «Мен бюгюн ишлеген коллективни асламы жаш адамладыла. Полицияны участка уполномоченныйи толтургъан жумушла къыйындыла, жууаплыдыла, алай ишчи нёгерлерим аны билип, ангылап  келедиле бу ишге. Аланы эм битеу коллегаларымы профессионал байрамыбыз бла алгъышлай, саулукъ тилейме. Генерал болургъа сюймеген сержант жокъду дейдиле да, бийик чынлагъа жетиширлерин тежейме. Юйюрлеринде ангылаулукъ, сюймеклик табып, ишге къууанып жюрюрча болсунла».