Игилиг а къайтмай къалмайды

Адамны этген ахшылыгъы не заманда да бир башха болумла бла артха къайтмагъанлай къалмайды деп бошдан айтылмайды.  Бу болгъан иш да анга шагъатды. Бизни жигитибиз Ахмат окъууун бошагъанындан сора, ишге кирип, ызы бла юйюр къурагъан эди. Совет союзну заманы болгъаны себепли, жаш юйюрге общежитияда отоу да бериледи. Талай замандан юйюрню эки къызчыгъы да болады.

Анда аладан сора да кёп юйюрле жашай эдиле. Онгсузуракъла да бар, ичерге, къарыусузгъа ауузун оздурургъа сюйгенле да тюбегендиле. Ахматны адамлыгъын, таза жюреклигин, къарыусузгъа болушлукъ этерге  сакъ болгъанын а барысы да кёре эдиле, бютюнда он жылы толгъан Салимачыкъ. Ол ата жылыусуз, жангыз анасы бла  ёсген баланы кёлюне тие тургъанла да болур эдиле. Алай жаш юйюр ары келген бла Ахматны къызчыкъгъа сакъ болгъаны, ёз баласынача аталыкъ этип тургъаны аны мудах кёзлерин жарыта эдиле. Кесини къызчыкъларына бир зат алса, андан Салимагъа да юлюш чыгъармай  къоймагъанды.  

Алай жылла да озгъандыла, Салима да школну бошар къыз болгъанды. Жаш юйюр да юй ишлеп, общежитиядан ары кёчедиле. Ол заманлада, бюгюнлюкдеча, телефонла да жокъ эдиле, байламлыкъ жюрютюп турургъа да амал болмагъанды. Салиманы поваргъа окъуугъа киргенин да билип къууаннган эдиле. 

Алай бла жылла да озгъандыла, Ахмат, бла Зулийханы да къызчыкълары школну жетишимли бошап, окъуулагъа да киредиле. Ахмат халал жюрекли адам, бай болуп жашамагъан эсе да, юйюрюн бир заманда да абызыратмагъанды. Юйдегисини эрттеден бери да Тюркде солургъа  умуту болгъаны себепли, аны къууандырыр ючюн, талай жылны ахча жыйышдырып, аны ары, къара тенгизни жагъасында солургъа элтеди.

Анда  беш жулдузлу номер болмаса да, бир тап къонакъ юйде да тохтайдыла. Ол керти да ариу ишленнген, люкс, эконом номерлери болгъан мекям эди. Къауум кюнню анда солуп,  ингирде ол ариу, кенг тахталары бла ёрге номерлерине минип бара тургъанлай, Ахмат бла Зулийха энишге тюшюп келе тургъан бир омакъ, бай кийиннген ариу тиширыуну кёредиле.  Ол тиширыу да аланы эслейди, алагъа къарап ышарады. Алай ол аланы къатлары бла озуп кетмегенлей: «Ахмат, сиз мени танымадыгъызмы?» - деп соргъанына экиси да сёз табалмай къалдыла. 

Тиширыуну малкър тилни аламат билгенине да сейир этдиле. Алай къулагъымамы эшитилген болур деп, бираз сагъышлы да болуп, башы бла булгъап: «Угъай», - деди. Алай ол ариу тиширыу андан да бек ышарып: «Да мен Салимама, сизни манга салгъан къыйныгъыз кёпдю. Унутупму къойгъансыз мени?» - дегенинден сора, Ахмат къызчыкъны ол мудах кёзчюклери эсине келип, энди аллында омакъ, эки кёзю да жулдузлача жарыгъан тиширыу сюелгенине  къууанып, кёлю толады.  Зулийха да, ол да  Салиманы тансыкълап къучакъладыла. 

– Сен да солургъамы келгенсе, балам? Не ишлеп тураса?- деди Ахмат. 

– Угъай, бу къонакъ юй меникиди. Муну къатында беш жулдузу болгъан къонакъ юйле да, тюкенле да баш ием бла меникиледиле, – дейди Салима. 

Ызы бла уа, анасына къартлыгъына бир фатар алыргъа мураты болуп, окъууун бошагъанындан сора бир къауум нёгери бла мында къонакъ юйлени ашханаларында ишлерге, юйренирге келгенлерин айтады.

Алай къадар буюруп, баш иеси бла танышады, ол заманда да ол къолайы болгъан жаш эди. Бирге юйюр къурайдыла, байлыкълары андан да кёп болады, эки сабийи да бар. Анасы бери келип къалыргъа унамагъан эсе да, анга да омакъ юй алгъанды, ол да тынч жашагъанын билдиреди, туудукъла ары терк-терк баргъанлай турадыла.  

Ызы бла уа Салима  ишчисине была мени бек сыйлы къонакъларымдыла, былагъа эм иги номерни беригиз, дейди. Ахмат бла Зулийха абызыратыргъа сюймегенлерин да, ол тургъан номерлери да аман бомагъанын айтханлыкъгъа, Салима алай болмаса унарыкъ тюйюлме, деп ары кёчюртеди. Ол кюнден башлап хар сюйгенлерин да тапдырып тургъанды. 

Аламат солууларыны ыйыгъы да бошалып, артха кетерге бир кюн къалып тургъанлай, эрттенликде отоуларыны эшиклери къагъылды. Ол Салима жиберген шофёр эди. Манга сизни былайда аны  кийим  тюкенлерине элтирге буйрукъ берилгенди, анда зат алыргъа сюе эсегиз, дейди. 

Алай аллай къоранчлагъа ахчалары болмагъан жигитлерибиз абызырайдыла. Зулийха, угъай, сау болугъуз, зат да сюймейбиз алыргъа, дейди. Алай ол шофёр дагъыда анга буюрулгъанны айтады.  Ахмат да не этерге билмегенлей: «Кел, барып къарайыкъ да, сора ахчабыз жетмесе, кетербиз»,- дейди. Алай аланы керти да бир багъалы тюкенледен бирине элтедиле. Анда дуниягъа белгили бренд кийимле, тиширыула сюйген багъалы норка тонла да бар эдиле. Сатыучула алагъа ариу тюбеп, хар кийимни да юслерине  кийдирип, къайсы ариу ушайды, къайсын жаратасыз а деп, соруп турдула. Аллай багъалы затлдан алыргъа амаллары болмагъанлай: «Сау болугъуз, экинчи кере келсек, алырбыз», - деген сылтау бла ала чыгъып кетедиле.

Юйге кетерден алгъа деп, къара тенгизге да барып, эсде къалырча да сувенирле алып, ингирде номерлерине келедиле, анда уа эл бла бир омакъ коробкала. Бу уа не аламатды деп, бирин башын ачсала уа, анда Зулийха эрттенли юсюне кийип жаратхан багъалы норка тон. Башха орунлада да ала кийген, ариу келишген кийимле жыйлып тура эдиле. 

Бираздан а къонакъ юйню иеси Салима да келеди. Ахмат: «Къызым, отоугъа биз бюгюн юсюбюзге кийип кёрген кийимлени келтирип кетгендиле, алай биз аланы алырча амалыбыз жокъду»,- дейди. Салима, ышарып: «Мен сизни ары бошдан ашыртмагъанма, камера бла къарап, сиз ушатхан киймлени жыйышдыргъанма. Сиз манга, ёксюз сабийге, уллу кёллю болмагъанлай, ата кёзден къарап, жюрегими къууандыргъаныгъызны багъасы жокъду. Ол сизни манга этген адамлыгъыгъыз ючюн, бир  гитче саугъачыкъды», – деп, Салима экисин да къучакълады.

Адамны этген ахшылыгъы, халаллыгъы да хар заманда да къайтады,  Ахмат бла юйдегиси уа этген игиликлерине узакъ къыралда тюбегендиле.