Жаш тёлю тюз жолдан таймазча

Кёп болмай Къабарты-Малкъар къырал университетде «Зарлыкъгъа бла жаулукъгъа жер жокъду» деген  федерал оператив-профилактиканы чеклеринде «Интернетде террорист биригиулени идеологиясы: анга къажау турууну энчи амалы эм технологияла»   семинар бардырылгъанды.

Анга къатышханла бюгюнлюкде жарсытхан сорууланы, ол санда информация технологияла бла байламлы къоркъууланы юсюнден сюзгендиле. Ол себепден аслам эс   жаш тёлюге бёлюннгенди.

  Тюбешиуде спикерлени орунунда  энчи аскер операциягъа къатышхан,  «Ата журтну къоруулаучулары» фондну Къабарты-Малкъарда бёлюмюню таматасыны орунбасары Чеченланы Элдар, жаш тёлю правительствону таматасы Байтуугъанланы Исмайыл болгъандыла. Жыйылугъа студентле, педагогла эм башхала да къатышхандыла.

Жыйылыуда бюгюнлюкде   экстремизм бла терроризмге къажау туруу, окъуучуланы къоркъуусузлукъларын жалчытыу  баш жерни алгъанын белгилегендиле.  Жаш адамла, кеслери да билмей,  терс жолгъа ажашып кетерге боллукъдула. Ала жангы затха тартыныргъа, кеслерин кёргюзтюрге ёчдюле, анга кёре  социал сетьледе алдау сайтлагъа берилирге кёп керек тюйюлдю.  Аны себепли  заманында эс бурулурча мадар излерге тийишлиди.

Семинар Ич ишлени экстремизмге къажау туруу арасыны, Жаш тёлю  правительствону эм КъМКъУ-ну башламчылыкълары бла къуралгъанды.