Аш хазырлаучула эришгендиле

Басхан районну Атажукино элини прогимназиясыны келечилери Къабарты-Малкъардан «Эм иги мектеп ашхана-2024» деген Битеуроссей эришиуге къатышхандыла. Ала конкурсну  «Сабийликни татыуу» деген бёлюмюню призёрлары, аны бла бирге  уа конкурсну жашчыкъладан бла къызчыкъладан къуралгъан жюрисини саугъасына тийишли болгъандыла.

Эришиуню лауреатларына  дагъыда Басханны К.Мамхегов атлы онжетинчи номерли школуну келечилери саналгъандыла. Конкурсну эсеплери  Саранскда белгили болгъандыла. Анга 110 къауум бла 50 школну  аш хазырлаучусу къатышхандыла.

Эришиуню мураты муниципал эмда регион даражалада окъуучуланы жылы аш бла жалчытыуну эм ахшы  юлгюсюн баямлауду. Аны бла бирге уа бу усталыкъны даражасын кётюрюудю эмда аны жамауат арасында белгили этиудю.