Жангы мектепле ишлене турадыла

Республикада ахыр жыллада талай кесек жангы орта школ ишленнгенди. Ала шёндюгю излемлеге келишген, эркин, уллу мектепледиле. Аны бла  къурулуш чекленип къалмагъанды, шёндюледе  да бир-бир жерледе ол тохтаусуз барады.

Мектепледен бирин Прималкинское элде сюей турадыла. Анга Къабарты-Малкъарны Правительствосуну Председатели Мусукланы Алий, къурулуш эмда жашау журт-коммунал мюлк министрни къуллугъун толтургъан Алим Бербеков, жарыкъландырыу эмда илму министрни орунбасары Мокъаланы Ачемез барып къарагъандыла. Алагъа Прохладна районну башчысыны орунбасары Марина Лутова, администрацияны къурулуш, архитектура, промышленность, энергетика, транспорт, связь эмда ЖКХ  бёлюмюню таматасы Рустам Белгаров, билим бериу управленияны башчысы Татьяна Золко да къошулгъан эдиле.

Делегация къауум ол школну жангы корпусуну къурулушу къалай баргъанына къарагъанды. Ол кеси да бу жылны ахырына хайырланыргъа берилликди, дейдиле. Шёндю ишчиле аны башын жаба турадыла, дагъыда терезелерин бла эшиклерин салыу, къабыргъаларын сюртюу-бояу бла кюрешедиле. Андан сора да, коммуникация системаланы орнатадыла. Ишле бары да «Билим бериу» миллет проектни чеклеринде барадыла.

Ол кюн Мусукланы Алий Урван районда да болгъан эди. Анда Нарткъалада ишлене тургъан мектепге къарагъанды, алайда муниципалитетни башчысыны къуллугъун толтургъан Тлежуков Х.Х. бла тюбешгенди, къурулушну бардыргъан организацияны келечилери бла да ушакъ этгенди.

Бу мектепни уллулугъу тёрт мингден   аслам квадрат метрди, ол кеси да юч къатлыды, беш бёлюмден къуралады. Шёндю аны ичинде сюртюу-бояу ишле барадыла, подряд организацияны адамлары коммуникацияланы орнатыу бла кюреше турадыла. Объектни суу, электрокюч, жылыу бла жалчытхан кесини онглары боллукъду. Школну къатында уа футбол ойнарча майдан (жалгъан кырдыгы бла) ачыллыкъды. Анда да хар нени да быйыл тамам этерге таукелдиле.

Энтта да бир мектеп Александровская элде ишлене турады. Анга уа Май районну башчысы Татьяна Саенко къарап келгенди. Муниципалитетни пресс-арасындан билдиргенлерича, объект хазыр болуруна кёп къалмагъанды. Шёндю ишчиле аны чардагъын жылыуну тутхан материалла бла жаба турадыла, биринчи этажында отоу тюплени бетон къуюп жарашдыргъандыла. Къабыргъаланы мылы  тартмазча этгендиле, сюртюрге хазырлагъандыла.

Мектепни алты бёлюмю барды да, аладан тёртюсюне жылыу берип башлагъандыла, къалгъан экисин да анга хазырлай турадыла.

Экинчи этажы уа хазырды дерге боллукъду: къабыргъаларында эмда отоу тюплеринде плиткасы барды, аланы сюртюп, жасалап бошагъандыла. Ишчиле дагъыда лифтни орната турадыла, мектепни тыш къабыргъаларын сюртюу бла кюрешедиле, тёгерегин айбатландырып башлагъандыла. Ызы бла, кёп да бармай, бордюрла орнатырыкъдыла. Футбол майдан а хазырды, ол школну спорт инфраструктурасыны магъаналы кесеги боллукъду.