Къыралыбызны миллетлерини юслеринден ким иги биледи?

«Миллетле кёпдюле, къырал а бирди» деген чакъырыу бла Нальчикде Мальбахов атлы миллет китапханада Уллу этнография диктантны жазгъандыла. 

Россейни маданиятыны эм тарыхыны, аны миллетлерини адет-тёрелерини юсюнден билимлерин сынаргъа китапханада власть органланы, жамауат биригиулени келечилери, дин ахлула, белгили спортчула, жырчыла бла тепсеучюле жыйылгъандыла. Къабарты-Малкъарны халкъ артисти Текуланы Амур а бизге дери сакълана келген адетлени, тин-ниет, маданият тёрелени унутмазгъа чакъыргъанды. Ол белгилегенича, тамырларын унутханны тамбласы да мутхузду. Къабарты къырал драма театрда ойнагъан Ахмед Хамурзов а биз бюгюн жаш тёлюге кёргюзтген юлгюню ала тамбла къайтарлыкъларын ангыларча жыл саннга жетгенме, бу хазнаны алагъа ётдюрмесек, ала ызалырындан келген тёлюню неге юйреталлыкъдыла, ол себепден диктантха сюйюп къатышама, дегенди.

Нальчик килиса округну благочинныйы Валентин Бобылёв инсан миллетини тарыхын билсе, аны маданиятын, тёрелерин, динин багъаласа, халкъыны кесеги болады, алай эсе уа миллетине тамбла жангы кюн атарына да ийнаныу къалады, деп чертгенди.

Этнография диктант къыралны битеу регионларында да бардырылгъанды. Бизни республикада анга дайымда аслам адам къатышыучудула, анга шагъатлыкъны былтыргъы эсепле этедиле. Диктантны онюч мингнге жууукъ инсан жазгъандыла, аланы иги кесеги жюз балл да алгъандыла. Быйыл жазгъанладан да бийик кёрюмдюле сакъланадыла. Миллетлени ишлери эм да жамауат проектле жаны бла министрни орунбасары Гергъокъланы Джамбулат айтханыча, бу диктант ала билмеген соруулагъа жууапланы тюрлю-тюрлю жерледе излерге кёллендиреди, къыралыбызны этнография байлыгъыны юсюнден теренирек билирге сейирни къозгъайды. Анга аслам адам келгени уа жамауатны жанындан сейир уллу болгъанын кёргюзтеди, деп къошханды ол.

Алай бла диктантда къыркъ беш минутну ичинде отуз соруугъа жууап берирге керек болгъанды, ала Россейде жашагъан миллетлени маданиятларыны бла тёрелерини юслериндендиле. Башкирлени, кърым татарлыланы, белорусланы, Шимал Кавказны миллетлерини юслеринден да сорулады. Диктант жамауатны этнокультура жаны бла билимин ёсдюрюрге, миллетле аралы келишиулюкге эс бурдурургъа себеплик этеди. Аны жазгъанланы барысына да уа шагъатлыкъ къагъытла бла саугъала берилгендиле.