Байрамгъа аталып

«Халкъланы шуёхлукълары» деген аты бла Прохладныйде миллет маданиятланы регионла аралы фестивалы бардырылгъанды, аны чегинде халкъ къолдан усталыкъланы кёрмючю да къуралгъанды.

Фестиваль тёрели халда жыл сайын Халкъ бирликни кюнюнде ётдюрюледи, анга къоншу республикаладан къонакъла да къатышадыла. Мураты уа – жаш тёлюню Россейни халкъларыны маданиятлары бла шагъырейлендириудю, башха-башха миллетлени келечилерин бирикдириудю. Прохладный шахарны администрациясыны башчысыны къуллугъун толтургъан Кирилл Кожухов айтханыча, жаш тёлюню тюз ниетледе юйретиу тамблагъы кюнню мурдоруду. «Сабийле чыгъармачылыкъны юсю бла хунерлерин ачыкъласала, биз да къууанабыз. Бюгюн мында абадан чыгъармачылыкъ къауумла да бардыла. Жыйылгъанла башха-башха миллетлени келечилеридиле, айтханымча, жыл санлары да бирча тюйюлдю. Бюгюннгю кюн а аланы барысын да бирикдиреди», - дегенди ол.

Фестиваль талай жаны бла бардырылгъанды: жырлау, тепсеу, инструментледе согъуу, кийимлени кёргюзтюу. Юлгюге, Чечен Республикадан къонакъла тепсегендиле эм жырлагъандыла.  «Волна Терека» жырчы къауумну келечиси Магомед Абубакаров билдиргенича, ала бу фестивальгъа жыл сайын къатышадыла, аны уллу хурметге да санайдыла. «Экинчи жыл да регионубузну атындан бери келирге хазырбыз. Къараучуланы юслеринден да энчи айтырыкъ эдим, ала къарслары бла кёл этдиредиле, таукеллик бередиле», - дейди ол. Ингушетиядан а «Эзди» тепсеу ансамбль келгенди, ол къошунла бла тепсеуню кёргюзтгенди.  Сунженский районну  Маданият юйюню балетмейстери Любовь Мержоева уа мында алагъа жарыкъ тюбегенлери къууандыргъанын, чакъырылсала, энтта да сюйюп келликлерин белгилегенди. Халкъланы шуёхлукълары – ол, эм алгъа мамырлыкъды, ырахатлыкъды, деп да къошханды. 

Кертиси бла да, сахнагъа чыкъгъанланы барысына да къараучула уллу ыразылыкъ бла тюбегендиле, ата-аналарыны къоюнларында олтургъан гитче сабийле окъуна алагъа къарс ургъандыла. Ахырында уа фестивальгъа къатышханлагъа дипломла, грамотала бла эсде къалырча саугъала берилгендиле.

Байрам болгъан кезиуде анда дагъыда «Тёрели маданиятда халкъ къолдан усталыкъла» деген кёрмюч да къуралгъанды, анда районну «Антураж» театрыны миллет жыйрыкълары кёргюзтюлгендиле.