Бирликни кючлерге келишгендиле, экстремизмге къажау амалланы да сюзгендиле

Къабарты-Малкъарны келечилери КъМР-ни миллетлени ишлери жаны бла эмда жамауат проектле министри Анзор Курашиновну башчылыгъында Москвада бардырылгъан «Россейни халкълары» деген битеуроссей форумгъа къатышхандыла. Анда Россей Федерацияда миллетле аралы къырал политиканы айнытыу сорууланы сюзгендиле. Форумгъа федерал, регион эм муниципал власть органланы эм жамауат биригиулени келечилери, экспертле,  илму бла кюрешгенле эмда асламлы информация органлада ишлегенле къатышхандыла.

Биринчи кюн форумгъа келгенле идеологиягъа къажау амалла, миллетле аралы къырал политиканы бардырыуда жамауатны билдириуле бла жалчытыу эм шёндю къыралны аллында тургъан борчланы тамамлау бла байламлы чакъырыуланы эм къоркъуусузлукъну жалчытыу бла байламлы сорууланы сюзгендиле.

 Энчи аскер операциягъа къатышхан, кёп халкъланы келечилери аскер къуллукъ этген «Пятнашка» бригаданы командири Ахра Авидзба кёп миллетлени келечилери,  къолларына сауут алып, къыралны сейирлерин къалай къоруулагъанларын айтханды. «Биз анда кесибизни орус аскерчилеге санайбыз, биз деменгили Россейни инсанларыбыз, аны бла ёхтемленебиз, хорлам бизни жаныбызда боллукъду»,-дегенди ол, башда сагъынылгъан секцияда сёлеше эм миллет башчыбызны Владимир Путинни тёгерегинде биригирге чакъыргъанды.

Форумну пленар жыйылыуунда белгили россейли экспертле  Миллет политиканы къырал стратегиясын сюзгендиле,оюмларын айтхандыла. РФ-ни Президентини Администрациясыны башчысыны орунбасары Магомедсалам Магомедов Владимир Путинни форумгъа къатышханлагъа этген чакъырыу сёзюн окъугъанды эм бу жыйылыуда къырал миллет политиканы жашауда бардырыу бла байламлы магъаналы соруула эм оюмла айтылгъанларын белгилегенди.

РФ-ни правительствосуну председателини орунбасары Татьяна Голикова къыралны ичинде миллетле аралы эм дин жаны бла да келишиулюк болгъаныны магъанасын энчи белегилегенди. «Ол алай болгъанына социология соруула да шагъатлыкъ этедиле. Анга кёре, шёндю къыралда жашагъанланы 94 проценти кеслерин россейлилеге санайдыла. Ол халкъланы араларында бирликни кёргюзтген заманда болмагъанча аламат кёрюмдюдю. Энди биз аны тюшюрмей тутаргъа эм андан ары айнытыргъа керекбиз»,-дегенди ол.

Федерация Советни  вице-спикери Константин Косачев миллет политиканы бардырыуда миграция жаны бла жумушлада жангылычла жибермей бардырыргъа кереклисин чертгенди. Кёп миллетли россейли халкъны бирлигин сакълау эм аны тарых, маданият хазнасын сакълау да уллу магъананы тутханын белгилегенди ол. Дагъыда Косачев Россей  миллетлени къыраллыкъларын сакълау жаны бла къурагъан модель бир жерде болмагъанын эм аны бир жерде кёп миллетле жашагъан башха къыралла да хайырланыргъа сюйгенлерин айтханды. 

Форумда халкъланы араларында байламлыкъланы жюрютюуде информация жаны бла тюз политиканы бардырыу соруулагъа аслам эс бурулгъанды. Аны юсюнден РФ-ни Миллетлени ишлери жаны бла федерал агентствосуну башчысы Игорь Баринов тынгылы айтханды эм ол соруугъа аслам эс бурулгъанын да чертгенди. Дагъыда ол пленар жыйылыуда сёлеше,  форумну иши россейли инсанлыкъны белгилерге эм миллетлени араларында бирликни кючлерге жораланнганын айтханды. «Къыралны аллында тургъан уллу борчланы барыбыз да бирча ангыларгъа, информация жаны бла ишлегенде уа,  иги да алгъа къараргъа керекбиз, нек дегенде жалгъан билдирулени кертинден айырыргъа да», -деп чертгенди ол. Дагъыда Игорь Баринов Анзор Курашиновха республикада ол башчылыкъ этген министерствону ишин жетишимли бардыргъаны ючюн РФ-ни Миллетлени ишлери жаны бла федерал агентствосуну сыйлы грамотасын бергенди.

 Пленар жыйылыуда сёлеше, АНО «Диалог-ну» башчысы  Владимир Табак къыралны ичинде бир жерде окъуна миллетлени араларында къаугъа чыкъса, аны юсюнден жалгъан хапарланы интернетде басмаларгъа хазыр болуп тургъанларын айтханды.  Аны бла байламлы форумгъа къатышхан журналистлеге халкъланы араларында ахшы юлгюлени, ариу адет-тёрелилени  юсюнден жазаргъа чакъыргъанды.

Форумну чеклеринде анга къышхан  600-ден  аслам адам «Уллу этнография диктантны» жазгъандыла. Андан сора халкъла аралы «Орус цивилизация» деген сурат конкурсда хорлагъанланы къууанчлы халда саугъалагъандыла. Белгилерчады, бир номинацияда Францияда бизни къыралгъа къачып келген 8 сабийлери болгъан юйюрню ариу сураты хорлагъанын. Французланы   Россейге келгенлерини сылтаулары-Европада бола тургъан «гендер революция».

Эки кюнню ичинде бардырылгъан  форумну итогларын эте, ол къуралыулу бардырылгъанын эм хар секциясы да къыйматлы ишлегенлерин, аланы барысына да  Къабарты-Малкъардан баргъанла тири къатышханларын белгилерге сюеме. Саулай да форумгъа келгенле аз санлы халкълагъа болушлукъ этерге кереклисин, жаш тёлюню  россейли  халкъланы тёрелерине таяна юйретирге кереклисин къатлап-къатлап айтхандыла. Дагъыда чай, кофе ичген кезиуледе биз бирикген халкъ болгъаныбызны, аны хайырындан Россей кючлюден-кючлю бола баргъанын, аны ёз халкъында Хорламны къаны болгъанын, аланы бир бирлери бла ёмюрледен бери да мамырлыкъда жашагъанларын эм ол шуёхлукъну бир зат да сындыралмазлыгъан къатлап айтхандыла.