Адамланы багъа да, алагъа билеклик эте да билгенди

Бизни республикада медицинаны айныууна къыйын салгъан кёп таулу врачла бардыла. СССР-ни  саулукъ сакълаууну отличниги,  КъМАССР–ни  сыйлы врачы Малкъарланы Ахмат аты айтылгъан врачладан бири болгъанды, КъМР–ни Правительствосуну, Парламентини, Саулукъ сакълау министерствосуну  сыйлы грамоталары бла саугъаланнганды. Ол  1981–2006 жыллада республикалы больницаны багъыу жаны бла баш врачыны орунбасары болуп тургъанды, 2006–2014  жыллада уа граждан къоруулау жаны бла баш врачны  орунбасары эди. Жашаудан 83-жыллыгъында кетгенди. Алай аны бла бирге ишлегенле, битеу жамауат да бу сейирлик адамны эслеринде тутадыла.

Малкъарланы Ахмат Лашкутада 1939 жылда  бешинчи январьда туугъанды. Къазахстанда тын  жерледе ишлегени ючюн майдал бла саугъаланнганды. Аскерде къуллукъ этгенди, ызы бла Астраханьда къырал медицина институтну  бошагъанды. Спорт бла кюрешип, классикалы тутушуудан спортну устасы болгъанды.

Институтну 1868 жылда бошап, бирге окъугъан юй бийчеси София Аведисовна Нагабедьян бла Астрахань областьны Володарский районунда ара район больницагъа жиберилген эди. Анда Ахмат Хусеевич кесин терен билимли врач– оториноларингологча кёргюзтгенди. Жарашыулу, ариу къылыкълы таулу жашны парткомну секретары этедиле, 1970  жылда Володарский районну баш врачына  айырадыла. Ол жыл районда холера жайылгъан эди, Ахмат Хусеевич аны къурутур ючюн уллу къыйын салгъанды.

 Таулу врачны районда бек багъалагъандыла, алай аны жюреги Ата журтуна итине эди, 1972 жылда юйюрю бла Нальчикде орналады. Алгъа ючюнчю номерли поликлиниканы филиалына башчылыкъ этгенди. Ызы бла республикалы больницада баш врачны орунбасары болгъанды. Биз бюгюн аны бла бирге ишлегенлени эсгериулерин басмалайбыз.

Къудайланы Шамил,  Республикалы больницаны баш врачыны орунбасары:

- Ахмат Хусеевич мени устазымды, бирге онбеш жыл ишлегенбиз, бет–жаякъ сюек хирургияда хирург болгъанымда, ол баш врачны орунбасары-начмед эди. Артда къуллугъундан пенсиягъа кетгенде, мени  аны жерине саладыла. Ийнанамысыз, Ахмат Хусеевич сау жылны къатымда олтуруп, къалай ишлерге керек болгъанына юйретип тургъанды. Огъурлу адам эди, жаннетли болсун.

Врачла, медсестрала бла бир тил бек тынч таба эди, хар адамны да сезген, ангылагъан, болушургъа хазыр болгъан  керти эр киши болгъанына шагъатлыкъ этеме. Кесине махтау бир заманда да излемегенди. Биз барыбыз да кесибизни коллективде, жамауатда ариу жюрютюрге андан юйреннгенбиз.

Ахмат Хусеевич бла София Аведисовна  сейирлик сабийле ёсдюргендиле: Алла ультразвуковой диагностика бёлюмню таматасыды, Олег – офтальмологду, кандидат диссертациясын да къоруулагъанды. Баям, аталары, аналары да врачла болгъаны жашны бла къызны къадарларында уллу магъананы тутханды, София Аведисовна функциональный диагностиканы врачыды.

Агнесса Кимова,

  Шимал–Кавказ федерал округну баш ревматологу, Республикалы больницаны ревматология бёлюмюню башчысы:

- Ахмат Хусеевич баш врачны орунбасары болгъанда, ревматолог болуп ишлеп башлайма. Кёк кёзлю, акъ шинли, ариу ауазлы, ушагъыулу адам эди. Мен Кардиология арада ревматология бёлюмню башчысы болгъанымда, аны  бла реанимацияда къыйын саусузлагъа болушхан кезиуледе тюбеше–тюбеше тургъанма.

Бир жол отузжыллыкъ жаш адам реанимациягъа тюшеди. Консилиумгъа жыйылгъанла аны ревматология жаны бла проблемасы барды, дейдиле. Мен а къарайма да, жокъду, деп арсарсыз айтама. Москвадан бир профессорну  чакъырадыла. Ол а мени оюмуму тюзге санайды. Ахмат Хусеевич а: «Бизни ревматолог жаш адам болгъанлыкъгъа,  саусузну ревматология жаны бла проблемасы болмагъанын кёрюп къойгъанына бек къууандыкъ», - деген эди. Билемисиз, жаш специалистге ариу сёз, махтау, къатында ишлегенлени   акъыл сёзлери да керек болады. Ахмат Хусеевич хар бирибизге да болушханды, ол дуниясы жарыкъ болсун. Бир  къауум жылдан  Кардиология арадан биягъы республикалы больницагъа къайтама, биз бирге ишлеп башлайбыз. Малкъар улу  бизни барыбызны да бирлешдиргенди, врачланы араларында шуёхлукъну кючлендирген адам эди.

Ирина Шериева, Республикалы больницаны врач–лаборанты:

- Лабораториягъа бир зат керекди, десек, Ахмат Хусеевич аны тапхынчы тынчаймай эди. Белгилисича, диагноз салыр ючюн шёндюгю медицинада тынгылы аппаратура изленеди, аны алгъандан сора да, тап халда тутаргъа тюшеди.

Лабораториялада халны сюзгенлей, билгенлей, болушханлай тургъанды. Бир–бир къуллукъчуланы къатларына барыргъа окъуна къоркъадыла ишчилери, бизде алай болмагъанды, не кемчилигибизни, не къууанчыбызны да Ахмат Хусеевич биле эди.

Гузер Каиров,

приёмный бёлюмню башчысы, хирург, бийик категориялы врач:

- Ачыкъ жюрегимден, кезбаусуз айтама: врачны сыфаты мени акъылымда бек алгъа Ахмат Хусеевич бла байламлыды. Кёп жылланы республикадан тышында ишлеп тургъанма, артда бери къайтханма, бирге ишлегенбиз. Баш врачны орунбасары – начмед болгъаны себепли,  тамата тенгим  хар айдан бизни жыйып, клиника – анатомия тинтиуле бардырыучу эди. Бек сейир эди алагъа тынгылагъан! Больницадан тышында да тюбеше эдик биз: Таукен улу, Ашноков, Малкъар улу, мен…ол алтын тёлюню адамлары бири бирини ызындан кетип барадыла. Шёндю келгенле да билимлиледиле, алай алгъыннгы акъылманларыбызны излегенлей турабыз.

Ахмат Хусеевич хар саусузгъа да эс бура эди. Палатада жер болмаса, коридорда табыучу эди жер, саусузну кёллендиргинчи,  кабинетине бармаучу эди.  Узакъ элледен танымагъан адамлары излеучю эдиле аны, биле эдиле: къайры барыргъа, къайда багъылыргъа юйретирикди, болушурукъду. Республикалы больницаны, бизни, битеу республиканы да сыйлы адамы эди, биз бюгюнлюкде да Ахмат Хусеевични унутмайбыз, аны битеу жашауу да – дерсди. Этген игиликлери юйюрюне игиликле бла къайтсынла!