Хычинлени бегирек жаратхандыла

Бу кюнледе «Кавказ.РФ» къурап, Минги тауда «Элбрусну татыуу» деген ат бла аш-азыкъ фестиваль къуралгъанды, анда адамла эм бек сайлагъан азыкъ хычинле болгъандыла, деп билдиредиле обществону пресс-службасындан.

Фестиваль Азау талада ётдюрюлгенди, анга 7 мингден аслам адам къатышхандыла, хар тёртюнчю инсан хычинлени кёрюрге сюйгенди. Конакълагъа, миллет азыкъла бла сыйланнгандан сора да, аланы этерге юйренирге онг берилгенди. Чыгъармачылыкъ къауумла, жырчыла, тепсеучюле уа жыр-тепсеулери бла байрамгъа бютюн уллу къууат бергендиле. Бу фестиваль бла тау лыжалада учуу кезиу да башланнганды. Алай бла ол тири солууну, татлы, татымлы да ашланы сюйгенлени бирикдиргенди.   

- Быйыл аны жангыз туристле угъай, Минги тауну, Нальчикни, Кавказ Минерал сууланы, Россейни къыбыла регионларыны аш этиучюлери да ашыгъып сакълагъандыла. Фестивальны программасы да бек бай къуралгъанды, азыкъланы да кёп тюрлюсю жарашдырылгъанды, башлана тургъан боран да аны бардырыргъа чырмау болмагъанды, - дегенди обществону генеральный директоруну орунбасары Рустам Тапаев. 

Алай бла байрамда азыкъларын бла суусапларын 20-дан аслам компания келтиргендиле, алагъа сурам асыры уллудан, биринчи кюнню ингирине окъуна ала саулай да байрамгъа жетер деп алгъан продуктлары бошалгъан эди. Аланы терк-терк жангыдан алыргъа да тюшгенди. Кюн сайын хар ким да сюйген хычинледен башлап шорпа бла лягъургъа дери 50 тюрлю аш жарашдырылгъанды. Къонакъла шишликлени, локъумланы, мангалда хачапурини да жаратып татхандыла. Сыйлы къонакъланы араларында уа белгили апльпинист Алина Пекова да болгъанды, ол хычинле эм локъумла бла сыйланыргъа сюйгенди. 

Эсеплени чыгъаргъанда, юч кюнню ичинде фестивальны къонакълары эки мингден аслам стакан чай, кофе эм айран ичгендиле, аш-азыкъ да анга кёре къоратылгъанды, жангыз хычинледен беш жюзден асламы этилгенди. Профессионал аш этиучюле кюн сайын онушар мастер-класс кёргюзтгендиле. Алай бла майданда хар сагъатны ичинде жангы азыкъла этерге юйренирге боллукъ эди, сабийлеге да энчи майданла къуралгъандыла.