Жаш адамлагъа къайгъырыу бла

Кёп болмай Чегем районда биринчи кере жангы Жаш тёлю ара ачылгъанды. Аны къурулушун   «Жаш адамлагъа регион" деген битеуроссей конкурсда хорлагъанларындан сора бардырыргъа онг табылгъанды. 

Социал магъаналы объектни ачылыууна КъМР-ни Парламентинде Билим бериу, илму эм жаш тёлюню ишлери жаны бла комитетни башчысы Нина Емузова, жарыкъландырыу эмда илму  министр Анзор Езаов, жаш тёлюню ишлери жаны бла министр Азамат Люев,  энчи аскер операциягъа къатышханла, урушну ветеранлары,  жамауатчыла, Херсон областьны Голопристанский округуну, жаш тёлю организацияланы келечилери эм башхала къатышхандыла.

- Республикада жаш тёлю политиканы айнытыугъа аслам эс бурулгъанына жыйылгъанланы атындан Казбек Коковха  ыразылыгъымы билдирирге сюеме. Бюгюнлюкде  Чегем районда отуз  мингден аслам  жаш адам жашайды. Ала иш кёллю, фахмулу, акъыллы эм районларыны айныууна   къайгъыргъан инсанладыла. Ол себепден жаш тёлю ара аланы башламчылыкъларын жашауда бардырыргъа, билимлерин, сынамларын кючлерге да  аламат себеплик этер деп, бек ышанама,- дегенди Юра Борсов.  

Арада  мастер-классла, лекцияла бардырыллыкъдыла,  маданият-жарыкъландырыу проектлени къураргъа болушурукъдула  эм тюрлю-тюрлю  акцияла да ётдюрюллюкдюле.  Жаш адамла жунчумай ишлери бла кюреширча уллу конференц-зал, мастерскойла, медиастудия эм башха бёлюмле да ишлерикдиле.