Санкт-Петербургга тюзюнлей рейс

Кёп болмай «Россия» авиакомпанияны хауа кемеси  Санкт-Петербургдан "Нальчик" халкъла аралы  аэропортха  биринчи тюзюнлей рейс этгенди.  Ол КъМР-ни Башчысы Казбек Коковну, КъМР-ни, Санкт-Петербургну Правительстволарыны,   «Аэрофлот» эм   «Новапорт» биригиулени башламчылыкълары бла ачылгъанды.

Биринчи рейсде окъуна «Пулковадан» «Нальчикге»  учхан пассажирлени саны жюз процентге жетгенди.   

"Россия"авиакомпанияны келечиси  Сергей Стариков айтханнга кёре, къыралны жанындан болушлукъ этилгени себепли    Къабарты-Малкъарда жашагъанла эм   санкт-петербургчула да   терк эм уллу къоранч этмей учаллыкъдыла.  «Аны бла бирге къонакъла  таулада, курортлада солуп саулукъларын кючлерге онг табарыкъдыла. Сёзсюз, ол туризмни  айнытыуда,    уллу къошумчулукъду. Ол себепден келир заманда туристлени санына  танг кесек къошуллугъу баямды»,- дегенди Сергей Стариков. 

Рейсни «Россия» авиакомпанияны  Airbus A319 хауа кемеси тамамларыкъды. Кюз артында бла къышда ол байрым эм ыйых кюнледе ыйыкъгъа эки кере учарыкъды. 

Санкт-Петербургдан  14:00 сагъатда  учарыкъды эм  Нальчикде  18:05 сагъатда къонарыкъды. Ызына уа 19:15 сагъатда тебирерикди эм  Санкт-Петербургга    23:05 сагъатда жетерикди. 

Къышда Нальчик къыйматлы маршрутладан бирине саналады.  Элбрус  тау-лыжа курортлада солургъа, лыжалада учаргъа эм экскурсиялагъа  къатышыргъа сюйгенле аслам боладыла.  

Эсге сала айтсакъ,  2021 жылда «Россия»  авиакомпания  нейминг амал бла  Superjet 100  самолётларындан бирине «Нальчик»  атны бергенди. Ол шарт республика бла биригиуню арасында иги шуёхлукъ къуралгъанын ачыкълайды.