Узакъ эллеге жолла тап эм къоркъуусуз болурча

Келир жылда  Лескен районда «Къоркъуусуз эм тынгылы автомобиль жолла» миллет проектге кёре,  «Лескен-I-Огъары Лескен-Ташлы-Тала-Хазнидон» жолгъа тынгылы ремонт этилликди. Аны узунлугъу 3,1 километрге жетеди.  

Ишлени кезиуюнде Ташлы-Таланы  Ленин атлы ара  орамы да жангыртыллыкъды. Мында  школ, сабий  сад, фельдшер-акушер пункт, элни  администрациясы,  почта дегенча социал магъаналы объектле орналадыла. Анга кёп заманны ичинде къаралмагъаны ючюн иги  тозурагъанды, игилендирилгенден сора эллилеге эм къонакълагъа да  ахшы себеплик боллукъду. 

Тынгылы ремонтну кезиуюнде комлекс халда аслам иш этилликди. Ол санда  суу быргъыланы алышырыкъдыла, жолну мурдорун кючлерикдиле, тротуарла ишленирикдиле эм ахырында эки къат асфальт салынырыкъды. Аны бла бирге чыпынлы чыракъла  эм къоркъуусузлукъну жалчытырча темир буруула да  салынырыкъдыла.

Объектни ишлеп  кюн жылыннганлай башларыкъдыла.