Маданият юйге ремонт этиледи

Кёп болмай  Май районну администрациясыны башчысы  Татьяна Саенко, Октябрьское элде болуп,  «Культура» миллет проектге кёре Маданият юйге тынгылы ремонт къалай  этилгени бла   шагъырейленнгенди. 

Бюгюнлюкде аны башын жабып, тыш къабыргъаларын сюртюп, терезелерин  салып, ичинде  сюртюу-бояу ишлени  тамамлап бошагъандыла. Ол санда эллилени тилеклери бла клубну тышында  В. Ленинни мозайка халда  этилген  сураты да жангыртылгъанды.
Аны бла бирге Маданият юйню экинчи  къатында орналгъан  библиотека да омакъ бола турады.  Бусагъатда анга ламинат саладыла.   Тийиши жумушла бошалсала,  китап окъургъа сюйгенлеге аламат болум къураллыкъды.
Социал магъаналы объектни арбазы да айбатландырылырча элни администрациясы проектни  хазыр этгенди. Аны  бардырырча, келир жылда "Эл жерлени комплекс халда айнытыу" программагъа къатышыргъа сюедиле.

Саулай алып айтханда, ишле болжалдан кеч къалмай барадыла.  Планнга кёре,  Маданият юй  быйылны ахырына хайырланыргъа берилликди.