Борчла саулай да жыйылгъандыла

Кёп фатарлы юйлеге толу ремонт этиу регион операторну башчысы Къулийланы Мустафир быйыл тамамлагъан ишлерини эмда жууукъ заманнга умутларыны юсюнден билдиргенди.

Алай бла регион оператор борчланы жыйыугъа энчи эс бёлгенди, айтылгъаныча, бусагъатда ала тёлеулени саулайда аладыла. Бу кёрюмдю бла республиканы кёп къатлы юйлеге толу ремонт этиу фонду  къыралда экинчи жердеди. Быйыл ол жети жюз миллион сом багъасы ишле тамамлагъанды, жетмиш беш юй толусунлай жангыртылгъандыла. Къулийланы Мустафир айтханыча, этилген ишлени качествосу бийикди, аланы тизмеси да кенгертилгенди. Адамлагъа таплыкъгъа энчи эс эсеплеу приборлагъа бёлгенбиз, аны хайыры бла фатарланы иелери къоранчларын халатсыз тергерге боллукъдула. Юйлени башларын жапханда, бийик качестволу керекле алыннгандыла, темир-къошун тюрлюсю сайланнганды, деп билдиргенди.  

Тогъуз эм андан кёп къатысы болгъан бийик юйлени башларын чатыр халда жабып, регионубуз биринчи башлагъанды, бу амал Тырныауузда да хайырланылгъанды. Юйлени толусунлай жангыртыугъа уа быллай жумушла киредиле: къабыргъаларын, башларын эм инженер ызларын тапландырыу, тёгереклерин, тюплерин да тап халгъа келтириу. Экинчи жылгъа тёлеулени жыйыуну бютюн игилендирирге эмда жетмиш чакълы бир юйге къараргъа белгиленеди. Энчи аскер операцияда ёлгенлени юйюрлерини юч жюз минг сом борчлары алынырыкъ тюйюлдю. Алай бла бу борчла жабылып, ёлгенлени орунларына бу фатарлагъа быйылдан башлап ие болгъанлагъа квитанцияла борчсуз келликдиле. Къыралыбыз ючюн жан берген адамларыбызгъа ол эм аз хурметди, деп белгилегенди Кулийланы Мустафир.

Дагъыда бир жангычылыкъ – оператор коммунал жумушла ючюн тёлеулени бир системасын къурар умутлуду. Быллай башламчылыкъны алгъа да кийирирге кюрешгендиле, алай ахча кечигип жыйылгъанлары ючюн ол жетишимли болмагъанды. Жангы проектни жарашдыргъанда бу кемчилик эсге алыннганды.