АПК-да уруннганланы арасында жаш тёлю асламыракъ бола барады

Быйыл аграр бёлюмде иш излегенлени жарымындан асламысы 18-24 жыл санлыла эдиле. Барындан да бег а лаборант, геодезист эмда агроном усталыкълагъа сурам уллу болгъанды. Аны юсюнден Къабарты-Малкъар къырал аграр университетни сайтында чыкъгъан материалда айтылады.

Агропромышленность бёлюмге иш излегенлени жанындан арт кезиуледе сурам ёсюп барады. Ол алай болгъанына «Я в Агро» платформа бла Яндекс компания Россельхозбанкга бардыргъан тинтиуле шагъатлыкъ этедиле. Саулай къыралда иш излеу бла байламлы сорууланы саны жаз башында кёп болуучуду: былтыр, быйыл да ол алай эди. Быйыл а жай айлада да болум тюрленмегенди: излеу шартланы саны 144 миллиондан атлагъанды. Аны бла бирге АПК-да урунуу рынок да ёсе барады.

Яндексни тинтиулерине кёре, быйыл эм уллу сурам, башында айтханыбызча, лаборант, геодезист эмда агроном усталыкълагъа эди. Февральда лаборант болуп ишге орналыргъа сюйгенледен 40 минг запрос берилгенди. Геодезист ишге да сейирлери болгъанланы саны аз тюйюлдю, 12-18 минг чакълы болады. Агроном вакансиягъа уа сурам жылны кезиуюне кёре болады; мартда аны бек излеген эселе, августда уа онеки минг запрос берилгенди. Къалгъан къауумла, сёз ючюн, биотехнологла, зоотехникле, гидрологла бир тюрсде турадыла – айгъа 4 минг запрос бла.

«Агросектор – карьера къураргъа, иги айлыкъ алыргъа итиннгенлеге тийишли, ишде ёсерге онгла берген, сейирли вакансиялары да болгъан бёлюмдю. Кёп жаш адамла, хунерли специалистле да аны ангылап, бу бёлюмге иги эс буруп башлагъанларын кёргюзтедиле бардырылгъан тинтиуле. Бизни платформаны аналитикасы бу сферада уруннганланы орта жыл санлары быйыл иги да азайгъанын ачыкълагъанды. «Я в Агро» сайтда иш излегенлени аслам кесеги 18-24-жыллыкъ инсанладыла. Бийик билим берген учреждениялагъа сурам ёсе баргъанын да эслейбиз: порталны хайырланнганланы ючден бири ары ол умут бла кирген эдиле», - дегенди Россельхозбанкны финанс технологияланы айнытыу арасыны башчысы Екатерина Артюгина.

Агропромышленность бёлюмде барындан да кёп вакансияла Краснодар крайдадыла (2502), Москва областьдадыла (1750) эмда Татарстандадыла (1216). Аграр вузланы тауусханланы саны башхаладан эсе ма бу регионлада кёпдю: Краснодар край (2394), Белгород область (1452), Оренбург область (1214).

«Я в Агро» платформада шёндю 17 мингден артыкъ компаниядан 30 мингден аслам вакансия барды.