Шёндюгюлю излемлени эсге ала

Сабий чыгъармачылыкъны «Кюн шахар» академиясында къошакъ билим бериу жаны бла ишлеген муниципал къуллукъчуланы жыйылыулары болгъанды. Анда къошакъ билим бериуде умутланы, эм иги сынамланы, чурумланы юсюнден да айтылгъанды.

Жыйылгъанланы академияны окъуучуларыны чыгъармачылыкъ къауумлары бла республиканы жарыкъландырыу эм илму министрини къуллугъун толтургъан Анзор Езаов алгъышлагъандыла. Анзор Клишбиевич ала къыйын ишлеринде жетишимли болурларын, жыйылыу да ахшы ётерин тежегенди. Андан сора жыйылгъанла тёрт къауумгъа юлешиннгендиле эм министрни башчылыгъында юйретиуде бусагъатдагъы болумну, байламлыкъла жюрютюуде жангычылыкъланы юслеринден айтхандыла.     Анзор Езаов белгилегенича, бюгюнлюкде бизде ишлени бардырыу мардалары жарашдырылмайдыла. Аны магъанасы уа уллуду, нек дегенде анга кёре мюлк хазна жыйышдырылады, кадрланы хазырлау да барады.

Жыйылыуда сабийлени социал, граждан, патриот жаны бла айнытыуну, аланы дуниягъа кёз къарамларыны тохташыуу бла байламлы соруула да кётюрюлгендиле. Жыйылгъанла анга кёре оюмларын, сынамларын да айтхандыла.

Андан сора да, «Кюн шахар» академияда жаш адамлагъа усталыкъ сайларгъа болушадыла. Анда робо-классда абадан классланы окъуучуларына IT программированияны энчиликлерини юсюнден айтхандыла.

Информация технологияла бюгюнлюкде терк айныйдыла, бу жаны бла устала дайым да изленедиле. «Кюн шахарда» да сабийлени бу усталыкъ бла шагъырейлендириуню дурус аны ючюн кёргендиле. Бу дерсле абадан класслада окъугъанлагъа усталыкъ сайлагъанларында себеп болуруна да ышанадыла.  

Академияны башчысы Джаппуланы Тамара билдиргенича, сабийле робо-классда ишлеп кёрлюкдюле. Аладан сора уа IT-ни жашырынлыкъларына башха класслада окъугъанла да тюшюнюрюкдюле. «Бюгюнлюкде муратыбыз жаш адамлагъа шёндюгюлю усталыкъланы юслеринден билдириудю, андан сора да, «Тамбланы усталыкълары» деген лаборатория къурар умутубуз да барды. Информация технологияла уа, сабийле жашауларында къайсы ыз бла барыргъа сюйселе да, жарарыкъдыла», - дегенди ол.

Робо-класс академиягъа федерал проектни чегинде берилгенди. Россейде аллай классла жангызда отуз тогъуз билим бериу учрежденияда бардыла, алада сабийле микроконтроллерле эмда программирование бла шагъырейленедиле. Дерслени бергенде устазла светодиодланы юллерин да хайырланадыла, къызыл, кёк эмда жашил тюрсюнлени болушлукълары бла башха тюрсюнле чыгъарыргъа юйретедиле. Мында «Си» тилден сора да, математикадан, физикадан бла микроэлектроникадан билим керекди.