«Аскерчилерибизге салыннган борчла толтуруллукъларына ийнаныпма»

Россей Федерацияны тарыхында халкъ не заманда да къыралгъа къоркъуусузлукъ жаны бла къайгъы келсе, биригип болгъанды. Шёндюгю кезиуде да болум алайды деп айтыргъа боллукъду. Сауутланнган кючлерибиз Донбассда энчи аскер операцияны бардырып башлагъанлы юч жылгъа жуукълаша келеди. Не зат тюрленнгенди ол кезиуню ичинде къыралда, бизни тёгерегибизде деп сорургъа боллукъбуз кеси кесибизден. Бек алгъа айтырыгъым, президентибиз аскерчилерибизге салгъан борчну ала шарайыпсыз толтура баргъанларына тюшюнебиз. Къыралда идеология болум, хал да тюрленнгенди иги жанына дейик, алгъынча Запад, Европа Совет  эм башха биригиуле бизге не айтырыкъдыла деген затлагъа, оюмгъа да бир киши да къарамайды. СВО-ну бардырыу  бла Россей   жалынчакъсызлыгъын сакълар эм къоруулар ючюн, фашизмни жайылыуун тохтатыр ючюн артха турмазлыгъын ачыкъ кёргюзтеди, Украинаны тыш къыралла сауут- саба бла не къадар кёп жалчытып турсала да.

Эки жыл бла жарымдан аслам былай алып къарагъанда, азды адамны ич дуниясын, жашаугъа къарамын тюрлендирирге да, дерге боллукъбуз. Алай, биз барыбыз да кёребиз шёндю къыралда болгъан биригиулюкню. Была бош сёзле тюйюлдюле, халкъ асламла бла тюбешген кезиуледе эшитгеними жазама, жамауат да башха болгъанды, адамларыбыз къырал башчыбыз бардыргъан политикагъа ыразылыкъларын букъдурмайдыла, ачыкъ айтадыла.  

Эсигизде эсе, энчи аскер операция башланнгандан сора, жети айдан мобилизация бардырылыргъа буйрукъ чыкъгъан эди. Ол кезиуде военкоматха барыргъа къоркъгъандыла, тышына кетгенле да болгъандыла… Шёндю болум ахыр да тюрленнгенди. Аскерде къуллукъ этерге сюйгенлени саны ёседен - ёсе барады.    Келишим бла къуллукъ этерге сюйгенлени саны да ёседи.  Адамла уллу иш хакъ алгъандан сора да, Ата журтну къорууларгъа кереклисин кеслери иги ангылайдыла. Аскер борчларын СВО-да тынгылы толтуруп, бизни республикадан окъуна къаллай бир аскерчибиз къырал саугъалагъа тийишли болгъандыла. 

Халкъ энди ангылагъанды келир тёлюбюз мамырлыкъда, ырахатлыкъда жашар ючюн, кюрешни, ол санда идеология жаны бла да тохтатмагъанлай   бардырыргъа кереклисин. Аны ючюн ишибизни биригип бардырыргъа керекбиз, алайсыз  тамблагъы кюн белгисиз, мухтуз болургъа боллукъду. Насыпха, бюгюнлюкде къыралны инсанлары, ол санда жаш тёлюбюз,    жалынчакъсызлыкъ ючюн артха турмазлыкъларын билдиредиле.

Энчи аскер операциягъа къатышхан жашларыбызда болгъан къарындашлыкъгъа, аланы бир бирге билеклик этиулерине сукъланырыгъынг окъуна келеди. Бир юлгю, муну аллында «Звезда» федерал каналда СВО-ну ветераны-сакъаты Тёбен Чегемде ёсген Атайланы Илиясны эм аны бла бирге къуллукъ этген жашланы кёргюзтгендиле. Ол бериуде Илиясны атасы Мусабий, аскер къауумну таматасы генерал Апти Аллаудинов эм башхла да  сёлешген эдиле. Алай Мусабийни бла Илиясны айтханларын энчи белгилерчады. Атасы, жашы да эр киши, Ата журтха къуллукъ этерге чакъырылгъан эсе, ол ишни арсарсыз толтурургъа эм жаш тёлюню патриот жаны бла юйретиуге керегин белгилеген эдиле.  

Шёндю биз Сауутланнган кючлерибиз бла, Илияс эм аныча жигит  жашларыбыз бла ёхтемленирге боллукъбуз. Энчи аскер операцияда аскер борчларын толтургъанлагъа жамауатны болушлукъ этиую халкъны бютюн бирикдиреди. Алагъа кюн сайын керек бола тургъан затланы  автоколонна бла  ашырыу  эм юйюрлерине, къыралны эм бош адамланы жанындан себеплик тапдырыу тёреге айланнганды. Ол ишни республиканы оноучусу Казбек Коков къолгъа алгъанды  эм тийишлисича бардырады. Къысхасы, халкъ, хорламны жууукълашдырыргъа кереклисин ангылап, бирикгенди.

Эсигизде эсе, деменгили къыралыбыз чачылгъанда, Запад бизге хар не бла да болушурукъду, аны башчыларыны айтханларына тынгылап, анда жюрюген эриши адетлени, къылыкъланы алып тургъанбыз. Ол угъай эсе, билимибизни, маданиятыбызны  окъуна ол къыралланы мардаларына келишдирирге кюрешгенбиз, битеу дуниягъа айтылгъан культурабыз бла илмубуз болгъанын да унутуп.

 Арт эки юч  жылны ичинде уа хар зат да туура болгъанды, аланы бизге къаллай кир ниетлери болгъанларын ангылагъанбыз. Тюз бурунубузну тюбюнде Россейге къажау кюрешни бардырыр ючюн Украинаны халкъын бизге чюйре ниетлеге юйретип тургъандыла. Ол жумуш бир, неда эки жылгъа этилмегенди. Шёндю ачыкъ болгъан билдириулеге кёре, Украинада жашагъан бандеровчуланы тюз къырал оюлгъан кюнден хазырлап тебиреген эди Запад.

 Мен оюм этгеннге кёре, бу шёндюгю болум адамланы бир бирге жууукъ этгенди. Биз, алгъын заманладача къайгъыларыбызгъа жарсый, акъны къарадан, ётюрюкню кертиден айыра, жалгъан затланы да иги сезе башлагъанбыз. Бек башы уа - биз энди бир кесек эсли эм сабыр болгъанбыз.

«Энчи аскер операция Украинада тохташдырылгъан режимни тюрлендирирге деп башланнган эди, артда уа ол коллектив Запад бла урушха айланып къалгъанды. Ол себепден, къаугъа белгиленнген мардадан асламыракъ барлыкъды»,- дегенди кёп болмай къырал башчыбызны пресс-секретары Дмитрий Песков.

Аны айтханына шагъатлыкъгъа, энтта да бир юлгю.   Украинагъа дайым болушлукъ этип тургъан къыралланы къаууму да арт кезиуледе сокъурана, аскер сауутлары да бошала тургъанларына къайгъы этип тебирегендиле. Венгрияны таматасы Орбан бла Словакияны премьери Фицо запад политиклеге айтып кюрешедиле, Россейге къажау сюелиуню тохтатып, стол артында сёлешиулени бардырыргъа кереклисин.

Францияны президенти Макрон  барысын да озады билимсизлиги эмда Россейге къажау бардыргъан тыш политикасы бла. «Жууапсызлыгъы бла Макрон ючюнчю дуния урушну башларгъа сюеди», - деп чамланнганды Къырал Думаны башчысы Вячеслав Володин. Башхаланы айтханларына тынгыласанг, ала акъылдан  шашханлагъа, эслерин тас этгенлеге ушайдыла деригинг келеди. Бир бирлерине ал бермей, украинлы миллетчилеге болушлукъ этерге чабышадыла, кеслерини къыралларында болгъан къайгъыланы эм америкалыланы айтханларындан чыкъмай тургъанларын унутуп. Дагъыда ала унутхандыла Экинчи дуния урушда совет аскер немисли фашизмни аркъасын къалай ууатханын.   

 Къысхасын айтханда, бу арт эки- юч жылны жылны ичинде дуния, Запад политикле да тюрленнгендиле. Алгъын Россейге къажау жашырын сюелген эселе, тюрлю – тюрлю амалланы хайырланып тургъан эселе, энди бизге къажау сюелиуню ачыкъ этгендиле. Аны бла байламлы Владимир Путинни сёзлерин келтирирге сюеме: «Биз шёндю жангы заманда жашайбыз. Аны хайырындан биз бютюн кючлю болабыз, бийик даржагъа кётюрюлебиз. Къырал кеси да ичинден тюрленеди, кеси кесин толусунлай хар не бла жалчытады, жалынчакъсызлыгъы, ол санда технология жаны кючленеди».