Жаш тёлю ариу ниетледе ёсерча

Къабарты-Малкъарны Жамауат палатасында республикада добровольчествону айныууна себеплик этиу бла байламлы соруу кётюрюлгенди.

Жыйылыуну ача, палатаны билим бериу, илму, жаш тёлюню ишлери эмда добровольчествону айнытыу жаны бла комиссиясыны башчысы Байчеккуланы Нина кёп магъаналы социал жарсыуланы кетериуде, граждан обществону кючлеуде къырал бла жамауат волонтёрство къаллай магъананы тутханын ангылагъанларын белгилегенди.

Кётюрюлген соруугъа билдириуню Жаш тёлюню ишлери жаны бла министерствону добровольчествону айнытыу, жаш тёлюню Ата журтха сюймекликде юйретиу эмда муниципал власть органла бла байламлыкъла жюрютюу жаны бла бёлюмюню башчысы Мамайланы Таулан этгенди. Ол айтханыча, волонтёрствогъа себеплик 135-чи номерли «Жандауурлукъ ишни эмда добровольчествону (волонтёрствону) юсюнден» Федерал законнга кёре этиледи. Аны чегинде алагъа ишлерин бардырыргъа ахча бёлюнеди, къурау, информация, ангылатыула, мюлк, методика жаны бла болушадыла, отоула хакъсыз бериледиле.

Арт жыллада республикабызда къырал власть органла волонтёр биригиуле бла араларында байламлыкъла игилендирилгендиле, регионну Башчысында добровольчествону соруулары жаны бла совет къуралгъанды. Правительствону буйругъун толтурууну чегинде «Къабарты-Малкъарда волонтёрствону айнытыуну ресурс арасы» ишлеп башлагъанды, аны бёлюмлери битеу районлада бла шахарлада ачылгъандыла. Андан сора да, волонтёр биригиуле орта эм бийик усталыкъ билим бериу организацияланы барысында да бардыла. Добровольчествону айнытыуну магъанасын эсге ала, Жаш тёлюню ишлери жаны бла министерствода анга себеплик этиуню юсюнден законну проекти жарашдырыла турады. 

Республиканы Башчысы жамауат, коммерциялы болмагъан эм волонтёр биригиулени ишлерин дайым да эсепде тутады. Алагъа толтуруучу власть эм жер-жерли самоуправление органланы жанындан къайгъырыу уллуду, жаш тёлюню тин-ниет эм туугъан жерге сюймекликде ёсдюрюу, энчи аскер операциягъа къатышханлагъа эм аланы юйюрлерине болушлукъ этиу ишлеринде, башха башламчылыкъларын да  аланы жашауда толтурурча тутхучлукъ этиледи. 

Юлгюге, быйыл августну ал кюнлеринде республиканы Башчысы жетмиш волонтёрну ыразылыкъ къагъытла бла белгилегенди. 58-чи гвардия битеуаскер бёлюмден къорууланыугъа эмда аскер хазырлылыкъда туруугъа этген себепликлери, СВО-гъа къатышхан бёлюмлеге гуманитар болушлукъ дайым этгенлери ючюн «Граждан кишилик» деген саугъаланы бергенди.

Росмолодёжьну «Регион жаш адамлагъа» проектине кёре республиканы Профсоюзларыны маданият арасында Кёп жумушланы тамамларгъа жаш тёлю къуралгъанды, артда аллай арала Нарткъалада бла Къашхатауда да ачылгъандыла. Экинчи жыл а жаш тёлю арала Чегемде, Майскийде, Анзорейде бла Тырныауузда да эшиклерин ачарыкъдыла. Алада проект эм грант, жамауат эм волонтёр ишлени юслери бла жаш адамлагъа хунерлерин ачыкъларгъа, жашауда жерлерин табаргъа себеплик этиледи. Андан сора да, аралада психология, информация-консультация болушлукъ алыргъа боллукъду.

 Жаш тёлюню ишлери жаны бла министерство «Билим бериу» миллет проектни чегинде жарашдырылгъан «Социал тирилик» деген регион проектни да тамамлайды. Анга тийишлиликде добровольчествогъа болушууну «Огъурлу ишлени региону» битеуроссей конкурсну республикалы кесеги бардырылгъанды. Аны мураты инсанланы волонтёр эм социал ишлеге къатышыргъа кёллендириу, волонтёр къымылдауну кенг жайыу, бусагъатдагъы жамауатда добровольчествону тюрлюлерин айнытыу эди. Дагъыда эм уллу «Добро.ру» майданда активистле эсепге салынадыла, аны хайыры бла волонтёрлагъа юйретиуле къураладыла,  социал илмуланы «Добро. Университет» онлайн-университетде алагъа менеджмент, социал проектлени тамамлау жаны бла да билим бериледи.    

Жарыкъландырыу эм илму министрни орунбасары Екатерина Мисостова, сабийлени бла жаш тёлюню юйретиуге битеумиллет магъана берилгенин чертип, аны ючюн граждан обществону институтларыны, федерал, регион эм муниципал даражалада ведомстволаны кючлерин бирикдирирге тийишлисин айтханды. Россейли жамауатны тёрели тин-ниет хазнасын сакълар эмда жаш тёлюню ариу ниетлеге юйретир мурат бла мектепледе 217 волонтёр отряд къуралгъанды. Алагъа 15 мингден аслам окъуучу киредиле. Министерствону 626-чы буйругъуна тийишлиликде доброволецлеге ыразылыкъ эм сыйлы къагъытла, «Доброволец КБР» белгиле, маданият эм спорт  байрамлагъа льгота билетле бериледиле. Сора, ала усталыкъ билим алыргъа вузлагъа киргенде бу жаны бла жетишимлерине да къаралады – Къабарты-Малкъар къырал университетде алагъа – 3, Къабарты-Малкъар къырал аграр университетде – 2, Искусстволаны Шимал-Кавказ къырал институтунда уа 1 балл къошулады.

Республиканы миллетлени ишлери эмда жамауат проектле жаны бла министрини орунбасары Гергъокъланы Жамбулат билдиргеннге кёре, аланы жанындан жамауат биригиулеге ахча болушлукъ этиледи. «Быйыл тамамланылгъан 31проектден 26-сы жаш тёлю бла байламлыдыла, 2-си жаш тёлюнюкюдюле, къалгъан 2-си да волонтёр биригиулеге аталыпдыла», - дегенди ол.

 «Биринчилени атламлары» битеуроссей къымылдауну регионда бёлюмюню башчысыны орунбасары Забакъланы Азамат чертип айтханыча, аланы къауумларын кирген жаш адамлагъа усталыкъ, фахму жаны бла да кеслерин ачыкъларгъа, артда жашауларында дарарыкъ сынам жыярга битеу онгла бардыла. Ала социал болушлукъ этиу ишлеге, табийгъатны сакълау башламчылыкълагъа, маданият байрамлагъа, жандауурлукъ жумушлагъа дайым къатышадыла.

Нальчикни алтынчы мектебини директору Текуланы  Аслан алада доброволец отрядла ишлерин къалай бардыргъанларыны юсюнден билдиргенди. «Терк айныгъан жамауатыбызда инсан жерин табалырына, аны социал эм жамауат жашаугъа къошулуууна мурдорлукъну аны тин-ниет болуму, дуниягъа кёз къарамы этедиле. Юйретиуню бек биринчи борчу уа жаш адамланы социал жашаугъа къошууду. Аны тамамларгъа уллу себепликни волонтёрлукъ этеди, ол сабийлеге огъурлулукъну, къатындагъылагъа къайгъырыуну  юлгюсюн кёргюзтеди», - дегенди ол.

Палатаны комиссиясыны келечиси профессор Улакъланы Махти уа жаш тёлю биригиулени башчыларына бардыргъан ишлерине алимлени, жамауатда намыслары жюрюген адамланы чакъырыргъа, ол жаш адамлагъа хайырлы болурун эсгертгенди.          

Жыйылыуну эсеплерин чыгъара, палатаны башчысыны орунбасары Людмила Федченко: «Добровольчество эм волонтёр биригиуле бардыргъан битеу ишлени баш борчу ёсе келген тёлюлени Ата журтха сюймекликде, Уллу Ата журт урушну жигитлерини кишиликлерини юлгюсюнде  ёсдюрюу, айтхылыкъ тарыхыбызны билирге кёллендириу болургъа тийишлиди», - дегенди.

Ахырында сейирлери болгъан ведомстволагъа бла биригиулеге эсгертиуле жарашдырылгъандыла.