Хазырланнганлары, итиниулюклери да бирлешип

Нальчикде стол теннисден «Тамблагъа атлам» деген тёрели эришиу башланнганды. Анда къыралыбызны алты къыбыла регионундан - Къабарты-Малкъардан, Шимал Осетия-Аланиядан, Дагъыстандан, Адыгеядан, Ставрополь эм Краснодар крайладан - жашла бла къызла энчи эм къауум эсепледе сынашадыла, хар бир къауумгъа тёртюшер жаш бла къыз киредиле.

Эришиу тёртюнчю кере ётдюрюледи, кеси да талай кесекден къуралады. Майда бла сентябрьде эришиуле Тегенеклиде бла Ессентукиде болгъандыла, бусагъатда уа кезиу ара шахарыбызгъа жетгенди.  Къабарты-Малкъарны стол теннисден федерациясыны башчысы Андрей Климов билдиргеннге кёре, спортчуланы жоллары, аш-азыкълары, къонакъ юйде тургъанлары ючюн къоранчланы боюнуна спортну бу тюрлюсюню УГМК деген клубу алгъанды. Эришиуле бардырылгъан биринчи жыллада Нальчикдеги къауум башхаракъ эди, ол кезиуде ойнагъан гитче теннисчиле бусагъатда кеслерини къауумларыны башчыларыдыла. Энди да умутландыргъан, уллу жетишимлеге итиннген спортчула чыгъарларына ийнанабыз, дегенди ол.

Эришиулени баш судьясы Людмила Грязнова айтханнга кёре, алгъа къауумла барысы да бир бирлери бла ойнарыкъдыла, энчи эсепледе уа къытдыргъанла эришиуден чыгъып барлыкъдыла. Быллай жорукъланы хайырындан жаш спортчула сынам жыядыла, усталыкъларын ёсдюредиле. Аланы  эришиуге тынгылы хазырланнганларын, хорламгъа итиниулюклерин да белгилерге тийишлиди.

Эришиуле барысы да бошалгъанындан сора, хорлагъанла айырылып саугъаланырыкъдыла, алагъа спорт керекле алырча ахча да берилликди.