Огъурлулукъгъа итиндирген тизгинле шатык эшитиле эдиле

Быйыл поэзиябызны мурдорун салгъан, закий поэтибиз, акъылманыбыз Мечиланы Кязим  туугъанлы 165 жыл тогъанына аталып кёп тюрлю юбилей ишле бардырыладыла. Быллымны Маданият юйюнде да закий поэтни хурметине аламат тюбешиу къурагъандыла.

Эришиу халда 2-чи 7-чи классланы окъуучуларыны араларында къуралгъан байрамны хурметли жюрийи болгъанды. Аны санына  ёмюрюн устазлыкъгъа жоралагъан, бусагъатда да элни жамауат жашаууна тири къатышхан, бизни газетлерибиз бла журналларыбыз бла да байламлыкъ жюрютген Беккиланы Омар, Быллымны хурметли инсаны, устаз, суратчы Ахматланы Сейфутдин,  поэт, Отарланы Омар атлы район миллет къырал краевед музейни ишчиси Ёзденланы Женя киргендиле. Хар айтылгъан назмугъа, жыргъа да жыйылгъанла бары да  сюйюп тынгылагъандыла.

Эришиуге къатышханланы жыл санларына кёре,  эки къауумгъа юлешип, эсеплени алай чыгъаргъандыла:

Эм гитчелени араларында 1-чи жерге Ахматланы Биаслан, 2-чи жерге Будайланы Асият, 3-чю жерге Барасбийланы Ануар, таматаланы араларында уа 1-чи жерге Афашокъаланы Саида, 2-чи жерге Ахматланы Нурдин, 3-чю жерге Эфендиланы Азамат тийишли болгъандыла. Абадан классладан Залийханланы Мадина,  онлайн къатышып, 1-чи жерни алгъанды. Бу сабийлеге махтау къагъытла бла байрамны къурагъанладан саугъала да берилгендиле.

- Сабийле Кязимни назмуларын артыгъыракъ да сюйюп окъуйдула. Нек дегенде, окъулгъаны тынч, ниет магъанасы уа терен. Огъурлулукъгъа, тёзюмлюкге, итиндиргенлей турадыла ала.  Мечиланы Кязимни къайсы назмусун окъусанг да, магъанасы теренди.   Ол заманда, жарлы халкъны жашауу къыйын болгъанды,алай Кязим  хажини назмулары, себеплик, ийнанмакълыкъ бергендиле. Жарлы халкъына насийхат сёзюн айта, поэт  бек кёп назму жазгъанды. Ол келлик заманны юсюнден сагъыш этгенди, кесини халкъын бир заманда да унутмагъанды, бек сюйгенди. Жюрек жарсыуун, къыйнлыгъын да, назму тизгинле бла билдиргенди.

Кязимни сёзю хар бир таулуну жюрегин  жарытхан,  жылытхан да отча жанады, жашайды.  Сабийликден багъаламасакъ, абаданлыкъда тас этербиз бу байлыгъыбызны деп,  бу байрамны андан къурагъанбыз, - дейди Быллым элни Маданият юйюню таматасы Байзуллаланы Джамиля, тюбешиуню юсюнден оюмун билдире.