Къышда ток эмда газ бла жалчытыуда чурум болмазча

Къабарты-Малкъарда газ эмда электрокюч бла жалчытыучу предприятияла сууукъла башланырдан иги да алгъа хазырланып тебирегендиле къышха. Бу кюнлеге ала экилери да ишлерин  тамам этип бошагъандыла.

Алай бла  «Газпром газораспределение Нальчик» предприятияны тийишли программасыны чеклеринде, аны келечилери 190 километр ызлагъа, газны басымын тюрлендирип,  андан ары жиберген 220 пунктха тынгылы къарап чыкъгъандыла. Дагъыда жер тюбю бла баргъан 790 километр быргъыланы прибор бла тинтип, аладан газ чыкъмагъанын тохташдыргъандыла.

Бу ишни чеклеринде специалистле кезиулю ремонт бла да кюрешип тургъандыла, тот басмазча,  алтмыш километр быргъыланы боягъандыла, предприятияны техникасын да къышха тынгылы хазырлагъандыла. «Этилген ишлени хайырындан адамланы, коммунал эмда промышленность предприятияланы келир къышда кёк отлукъ бла жалчытыу ышаннгылы боллукъду», - дегенди «Газпром газораспределение Нальчикни» башчысы Залим Вороков.

Айтханыбызча, энергетикле да тири къармашхандыла. «Россети Северный  Кавказ» компанияны Къабарты-Малкъарда бёлюмю – «Каббалкэнерго» быйыл 342 километр электрокюч ызлагъа ремонт этгенди. Аны специалистлери ол санда 121 километр эски ызланы пластик бла тышланнган жангы тюрлюсюне алышхандыла. Компанияда айтханларыча, ол кеси да тёрели темир чыбыкъладан къайда игиди эмда чыдамлыды.

Энергетикле дагъыда эки минг чакълы тозурагъан чыпынланы, 6,7 мингден артыкъ эски эмда бузулгъан изоляторну жангы тюрлюлерине алышхандыла. Дагъыда ток ызла созулгъан жерлени (битеуда 74 гектар) юлкюледен бла бутакъладан тазалагъандыла. Этилген мадарланы хайырындан электрокюч бла жалчытыуда чурум болмазына ышанадыла компанияда.