Михаил Суановну хурметине - эришиу

«Спартак» стадионда регбиден, спортну бу тюрлюсюню ветераны Михаил Суановну хурметине аталып, эришиу бардырылгъанды. Ол сегизинчи кере къуралады. Анга сабий къауумла къыташхандыла, алагъа алыкъа онеки жыллары толмагъан жаш спортчула киргендиле. Михаил Суанов регионда регбини айнытыугъа уллу къыйын салгъанды, аны башламчылыгъы бла кёп тёлюбюз бу оюн бла шагъырейленнгенди.

Къауумла битеу да тёрт болгъандыла, ала Нальчикден бла Басхандан жыйылгъандыла. Эришгенлени араларында жашчыкъла, къызчыкъла да бардыла. Къабарты-Малкъарны регбиден федерациясыны президенти Руслан Сурженко айтханыча, бу эриишуню баш магъанасы анда сабийле сынам жыйгъанларындады. Мында ала къаллай даражагъа чыкъгъанларыны, жарауларында неге эс бурургъа кереклисин ангыларыкъдыла. Эсеплеге кёре жыйымдыкъ къауумуна кирлик спортчула айырыллыкъдыла, ала артда  республиканы атындан тюрлю-тюрлю эришиулеге къатышырыкъдыла.

Регбиден быйыл эришиуле кезиу бошала турады, экинчи жыл а бютюн сейир боллукъду, анда спортчуланы, къараучуланы да кёп сейир эришиу сакълайды. Россейни регбиден федерациясыны къыбыла регионлада бёлюмюню башчысы Мария Дремова билдиргеннге кёре, Шимал Кавказ федерал округлада бир жылгъа жыйырма беш эришиу къуралады, аладан алтысы экинчи жыл Къабарты-Малкъарда бардырыллыкъдыла.
Кульчаланы Зульфия.