Ток бла жалчытыу ышаннгылы болгъанды

«Россети Шимал Кавказ» компанияны Къабарты-Малкъарда бёлюмюню – «Каббалкэнергону» специалистлери 5,3 минг инсанны электрокюч бла жалчытыу бютюнда ышаннгылы болурча этгендиле. Ол умутда ала алгъаракъда 35 кВ кючлю «Советская» подстанцияны жангыртхандыла. Тийишли ишлени кезиуюнде энергетикле ол объектде токну тыйгъан эки эски устройствону жангы тюрлюлерине алышхандыла. Ала да Россейде этилген затладыла, алгъынладан эсе къайда игидиле, оборудование тынгылы ишлерча керекдиле.

Компанияда айтханларыча, «Советская» подстанция электрокюч бла битеу Къашхатауну жалчытады. Этилген ишлени хайырындан а анда жашагъан 5,3 минг адам эмда он социал магъаналы учреждение (ол санда больница, школла эмда сабий садикле) ток бла мындан арысында да ышаннгылы жалчытылынып турлукъдула.