Тышына сату этерге сюйгенлеге – сынам

Къабарты-Малкъарда экспорт бла кюрешген предприятиялагъа «Азербайджан Республиканы рыногуна чыгъыу. Битеу энчиликле эмда шартла» деген вебинар бардырылгъанды. Анга Россей Федерацияны ол къыралда Сатыу-алыу келечилигини, бизден эл мюлк эмда жарашдырыучу предприятияланы, КъМР-ни Экономиканы айнытыу министерствосуну, Сатыу-алыу – промышленность палатаны эмда КъМР-де Экспортха себеплик этиу араны специалистлери къатышхандыла.

Россейни ол Республикада сатыу-алыу жаны бла келечиси Руслан Мирсаяпов презентация бардыргъанды. Ол жыйылгъанланы Азербайджанны экономикасы бла шагъырейлендиргенди, анда промышленность, инвестициялы законодательство, тыш сатыу-алыу жумушланы таможня эмда тарифле жаны бла тийишдириу нечик айныгъанларын туура этгенди, Къабарты-Малкъардан предприятияла анда бизнес бла къалай ишлерге боллукъларын да билдиргенди.

Вебинарда айтылгъаныча, Азербайджанда Сатыу-алыу келечилик эки жанына да хайырлы байламлыкъланы айнытыу бла дайым кюрешеди. Ол санда экономика, промышленность, сатыу-алыу бёлюмлеге, халкъла аралы байламлыкълагъа бютюнда уллу эс бурулады.