Элде жашау иги болурча

Бабугентде орта школда тынгылы жангыртыу ишле андан ары барадыла. Бу мекям 1957 жылдан бери хайырланыуда болгъанды, аны ючюн андан бери анда этер ишле да жыйылгъандыла. Бюгюнлюкде школда 450 сабий окъуйду да, ремонт баргъан кезиуде алагъа дерслени элни Маданият юйюнде эмда сабий санында  бардырыргъа тюшеди, деп айтылады КъМР-ни Правительствосуну сайтында басмаланнган материалда.

Школда шёндюге не зат этилгенди: ичинде инженер ызла, эшикле, терезеле да алышындырылгъандыла, тапкалары жангыртыла турадыла, отоуларында эмда тышында сюртюу-бояу ишле барадыла. Тынгылы ремонт быйыл мартда башланнганды, ол «Къабарты-Малкъар Республикада билим бериуню айнытыу» программаны чеклеринде барады. Объектде хар затны  келир жылны аллына тамам этерге дейдиле. Ол а белгиленнген низамдан алгъаракъ окъуна боллукъду.

Бабугентде дагъыда Мечиланы Кязим атлы орамгъа кёп болмай тынгылы ремонт этип бошагъандыла. Аны узунлугъу 1,4 километрди, ол тийреде  билим бериу эмда спорт учрежденияла,  дагъыда амбулатория орналыпдыла. Ишлени кезиуюнде жолчула эки къат асфальт жайгъандыла, чыракъла орнатхандыла, тротуарланы да тынгылы жарашдыргъандыла. Ол бары да «Къоркъуусуз тап жолла» миллет проектни хайырындан этилгенди.

Жол дегенде, элде дагъыда Баший улу атлы орамгъа да этилгенди кезиулю ремонт. Ол да бек уллу орамды, узунлугъу 2,6 километрге жетеди. Анда ишле уа регион программаладан бирини чеклеринде бардырылгъандыла.

«Туризм эмда къонакъбайлыкъ индустрия» миллет проектни юсю бла берилген ахчагъа элде кэмпингле къуралгъандыла. Черек таргъа келген къонакъла алада тохтап, тап, тынгылы солургъа боллукъдула. Алада А-фрейм маталлы он юйчюк барды. Къуру кеслери неда юйюрлери бла жолоучулукъгъа чыкъгъанлагъа алада бар онгла къуралгъандыла.

Дагъыда эсге салырчады: былтыр Бабугентни Маданият юйюню аллында майдан халда тап, эркин жамауат тийре жарашдырылгъанды. Аны уллулугъу эки минг квадрат метрден артыкъ болады. Алайда шинтикле, кир-кипчик жыйылгъан орунла да  бардыла, кече уа тийре чыракъла бла жарытылады. Бу жумушну «Тап шахар болумну  къурау» федерал проектни чеклеринде тындыргъандыла. Аны хайырындан элде дагъыда кёп фатарлы юйлени арбазлары тап этилгендиле.

Элни Маданият юйюне ахыр беш жылны ичинде музыка сокъгъан инструментле, оргтехника эмда автоклуб берилгенди («Маданият» миллет проект). «Таза суу» федерал проектни чеклеринде уа анда суу бла жалчытыу игиленнгенди, жангы быргъы да орнатылгъанды. Ызы бла уа Къара-Суу – Бабугент – Къашхатау суу ыз толуракъ болурча мадар этилгенди. Тийишли ишлени кезиуюнде специалистле 1600 метр быргъыла орнатхандыла, бир ненча  къую да жарашдыргъандыла. Аны хайырындан Бабугентде, Къашхатауада эмда Аушигерде суу бла жалчытыу игирек болгъанды.

Энтта да бир ахшы ишни эсге саладыла КъМР-ни Правительствосуну сайтында: былтыр Бабугентде Уллу Ата журт урушну жигитлерини эсгертмесине тынгылы ремонт этилгенди. Ол да къырал программаладан бирини хайырындан тамамланнган  ишди.