Мектепледе сабийле бирча кийинирге керекмидиле?

Мектепледе окъуучула бир кибик кийинирге тийишлимидиле огъесе алагъа аллай борч салыргъа керек тюйюлмюдю? Бу соруу талай заманны ата-аналаны, сабийлени, устазланы да сагъышландырып тургъанды. Бир жанындан къарагъанда, бир кибик кийиннген сабийле кёзге ариу кёрюнедиле, ала окъуучула болгъанларын узакъдан да ангылайса. Сабийлеге сюйгенлерича кийинирге эркинлик бериу араларында файда жаны бла башхалыкъны туура этерге боллукъду. Газет окъуучуларыбыз а аны юсюнден къалай сагъыш этгенлерин билир ючюн, соруу бардыргъанбыз. Ол а адамланы асламысы мектеплеге бирча кийниуню дурус кёргенлерин ачыкълагъанды.

Юлгюге, преподаватель Джулабланы Майрус школ форманы билим бериу учрежденияда борчлу халда кийирирге тийишлиди, деп жууаплагъанды. «Ол окъуучуланы барысында да бир кибик болса игиди – бир тюрсюнлю, бир къумачдан, бирча тигилген. Ол жумуш а школла кийимлени кеслери заказ этип алсала, игирек толтуруллукъду. Андан сора да, мен къызлагъа боялыргъа, мардадан кёп алтын жюрютюрге  эркинлик берлик тюйюл эдим. Жашчыкъла да низамлы, адепли болургъа керекдиле», - дегенди ол.

Устаз Расулланы Лейля да школ форманы кийириуню ахшы ишге санайды. Кёпле да менича оюм эте болурла, дейди Лейля Элдаровна, ол сабийлени араларында социал тенгликни тохташдырыргъа болушурукъду. Баям, бу башламчылыкъны терсге санарыкъла да чыгъарла. Мен ангылагъандан, ала окъуучуланы барысын да бир кибик кийиндириу аланы энчиликлерин тас этдирликди, дерикдиле. Болсада, инсанны энчилиги аны ариу, багъалы неда учуз кийими бла угъай, къылыгъы, сагъыш эте билгени, итиниулюгюню юсю бла туура болады.

Маданият ишчи Акъайланы Лейля да школ форманы кийириуню, окъуучуланы барысын да бир сыфатха келтириуню тюзге санамайды: «Мен сабийими башхала излегенича угъай, кесими кёз къарамыма, онгума кёре кийиндирирге сюеме. Бютюнда школ форманы качествосуна къарасанг, андан кёлюнг чыгъады. Бир ауукъ заманны сатыучу болуп ишлегенме да, аналаны къумачла алып айланнганларын бек иги билеме. Биринчиден, къумачха тёлетип, экинчиден, тикген адамгъа тёлетип, адамлагъа аллай бир къоранч чыгъарыргъа неге керекди?»

Редактор Къайгъырмазланы Инал да школ форма низамлыкъны тутаргъа себеплик этерикди, деп чертеди: «Аны кийириу бусагъатда жамауатда бютюн ачыкъ бола баргъан мюлк бла байламлы болумну женгиллендирликди деп, алай сунама. Нек дегенде аны болушлугъу бла сабийлени араларында ырысхы башхалыкъла кёзге алай урунурукъ тюйюлдюле».    

Бирча кийиниу кёлкъалдылыкъдан сакъларыгъын аспирант Теммоланы Фатима да айтады. «Мен оюм этгенден, школ форма къолайлары аз неда кёп сабийли юйюрледен окъуучулагъа тенглеринден башха болмазгъа болушурукъду. Андан сора да, ол бек ариуду, аны жюрютюу окъуучугъа ёхтемлик береди. Алгъа хар ким да сюйгенича кийине эди – школгъа «жыртыкъ» джинсала бла келиу бек эришиди деп, мен алай сунама. Башхача айтханда, кийимни юсю бла адам кесин бир тюрлю даражагъа салыу терсди. Школда уа окъууну юсюнден сагъыш этерге тийишлиди», - дегенди ол.