Таматаланы кёллерин жарытхандыла

Бу кюнледе Уллайгъан адамланы халкъла аралы кюню белгиленнгенди. Анга жоралап Черек районну администрациясыны Маданият эм туризм управлениясыны себеплиги бла Кашхатау элде жашагъан абадан адамлагъа деп энчи проект къурагъандыла. Алагъа саугъала да хазырлап, аланы юйлерине миллет макъамла согъуп баргъандыла. Къадырланы Джанита уа белгили эллилери Улбашланы Азнор айтыучу «Акъ таула» жырны эшитдирип кёллерин жарытханды.

 - Биз ол кюн Черкесланы Бабухну, Иттийланы Людмиланы, Узеланы Таусолтанны, Ёлмезланы Фатиманы, Къадырланы Марияны алгъышлагъанбыз. Таматала бизге аллай жумуш къурагъаныбыз ючюн кёп жылы сёзлерин айтхандыла. Бу керти да магъаналы иш болгъанын кёргенбиз, аны себепли  бу тёрени мындан ары да  бардырып турургъа умутлубуз, - дегенди методист Чеченланы Фатима.

Аны себепли бу проектге кёре Уллу хорламны аллында, сегизинчи майда да, тамата тёлюню бу халда алгъышларгъа, кёллерин кётюрюрге сюйгенлерин да билдиргендиле.

- Мен «Акъ таула» жырны бошдан сайламагъанма. Ол тамата тёлюню сюйген жырларындан бириди. Бу проект а керти да хар элде да бардырылыргъа керекли болгъанын ангылагъанма. Арбазларына къобуз да согъуп, жыр айтып киргенибизде, таматала къууанып, кёллери тола эди.  Хурметли абаданланы биз былай кётюргенибиз ючюн, аланы эл бла бир жылы сёзле, алгъышла айтханларыны да багъасы жокъду, - дегенди Къадырланы Джанита. 

Ызы бла къонакъла абадан тёлю бла эсде къалырча суратлагъа да тюшгендиле. Ол эллерини ариу адети болуп, аны тарыхына кирлигин да билдиргендиле.