Китапхана жангыртылгъанды

Майский шахарда А.С. Пушкин атлы китапханагъа тынгылы ремонт этилип бошалгъандан сора, бу кюнледе ол эшиклерин жангыдан ачханды. Ишле анда «Культурная среда» къырал проектни чеклеринде бардырылгъандыла, деп билдиргендиле Май районну администрациясындан.

Жангыртылгъан китапханада алгъыннгы тёреле бла шёндюгю амалла бир жерде келишгендиле. Анда оборудование эмда мебель орнатхандыла, къуру китап алыргъа угъай, хар ким да анда заманын кесине хайырлы ётдюрюрча этгендиле: сюйген олтуруп китап окъургъа, компьютерде ишлерге, дагъыда лекциялагъа, мастер-класслагъа, театр халда бардырылгъан постановкалагъа къатышыргъа, чай да ичерге боллукъду.

Аны бла бирге учрежденияны фонду эки минг китапха байыракъ болгъанды. Ала бары да жангыладыла, ичлеринде шёндюгю энциклопедияла, сёзлюкле, справочникле, бизни эмда тыш къыралланы классика чыгъармалары, сабийлеге литература да бардыла.

Китапхананы ачхан къууанчлы жумушха кёпле, ол санда культура министр Мухадин Кумахов, районну башчысы Татьяна Саенко да къатышхан эдиле. Мухадин Кумахов алгъышлап, бу объект жангыртылгъаны не жаны бла да магъаналы иш болгъанын чертгенди. Татьяна Саенко да ол сёзлеге къошулгъанды, кесини атындан талай китап да бергенди.

Ызы бла къызыл тасманы кесип, ала башха къонакъла бла бирге китапханада хар неге къарагъандыла, этилген ремонтха да багъа бергендиле.