Къырал магъаналы байрамгъа атап – къууанчлы жыйылыу

Отузунчу сентябрьде къыралыбызгъа жангы регионла - Донецк эм Луганск халкъ республикала, Запорожье эм Херсон областьла – къошулгъаны белгиленнгеди. Тарых магъаналы байрамгъа аталып Чегемни бешинчи номерли мектебинде митинг-концерт болгъанды.

Къууанчлы жыйылыуну гитче классланы окъуучулары Олег Газмановну жыры бла ачхандыла. Къараучула уа абадан классланы окъуучуларыдыла, бусагъатда тарыхыбызда бола тургъан ишлеге, Россей бу регионланы къаллай азаплыкъдан къутхаргъанына ала кеслери шагъатдыла. 

Чегем районну билим бериу ишчилерини профсоюзларыны башчысы Энейланы Лиза, жыйылгъанланы алгъышлай, жангы регионлада жашагъанлагъа билеклик этерге хазырлыкъларын, ала бла бирликлерин кёргюзтюрге жыйылгъанларын белгилегенди. Россей деменгили, кёп миллетли къыралды, кюнден-кюннге уа ол кючлене, айный да барлыкъды, деп къошханды ол.  

Къараучуланы араларында энчи аскер операциягъа къатышханла, душманны кёзден-кёзге кёрген, мамыр халкъны излемлерин билген жигитлерибиз да бардыла. Аладыла огъурсуз миллетчи низам бла къазауат этген, жанларын аямай мамыр адамланы къоруулагъанла. Аллай уланларыбыздан бири Герийланы Асланды. «Украинли миллетчилени сауут бла элли юч къырал жалчытадыла. Жангыз да миллетчи деген сёз къаллай осал магъананы тутады, аны къолунда сауут-саба бар эсе уа, ол жыртхыч жаныуар кибикди,- дегенди ол.

Митинг-концерт а жыйылгъанланы эслеринде къонакъланы, чыгъармачылыкъ къауумланы жыр-тепсеулери бла къаллыкъды.