Жашау болумланы игилендирирге жораланнган миллет проект

Бюгюн КъМР-ни Башчысы Казбек Коков Къырал советни комиссиясыны «Жашаугъа керекли инфраструктура» деген бёлюмюню жыйылыууна къатышханды. Кенгеш Къырал советни ол жаны бла комиссиясыны таматасы Татарстан Республиканы Раисы Рустам Миннихановну башчылыгъында бардырылгъанды.

 Жыйылыуну кезиуюнде Россейни Правительствосуну вице-премьери Марат Хуснуллин жангы миллет проектни юсюнден билдириу этгенди, ол алты жылны ичинде бардырыллыкъды. Бюгюнлюкде ол проект бизни Президентибиз Владимир Путинни буюуруу бла жарашдырыла турады.

Тамамланырыкъ ишлени асламысы сюзюлгендиле. Жангы миллет проектге жолланы ишлеу эм транспорт системаны айнытыу, жашау журтланы ишлеу, оюла тургъан юйледен кёчюрюу, коммунал инфраструктураны жангыртыу эм тёгерекни тапландырыу жаны бла он эки федерал проект киреди. Битеу сагъынылгъан затла этилирге керекдиле.

 Къабарты-Малкъарда белгиленнген бёлюмледе иш тири бардырылады. Беш жылны ичине 1000 километр жол тохташдырылгъан мардалагъа келишдирилгенди, ол санда социал магъаналы объектлеге элтген жолла, районлада жашау журтла аслам болгъан орамлагъа эм жамауат кёп жыйылгъан эм айланнган жерлеге.

 Быйыл Бахсанны группалы суу баргъан ызланы салып башлагъанбыз, ол бек уллу эм магъаналы инфраструктуралы проектди, дагъыда Зольскийде экинчи кезиуле суу алгъан жерни къурулушун ишлеп тебирегенбиз.

Эллерибизни тапландырыу жаны бла ишлени андан ары да бардыргъанлай турлукъбуз.

 Бек ышынама, жангы миллет проектге биз аслам санда къатышырыгъыбызны, ол бизни республикада жашагъанлагъа жашауларын игилендириу жаны бла ахшы онгла къурарыкъды, деп жазгъанды Казбек Коков кесини телеграм каналында.