Спорт бёлюмде уруннганланы онгдурургъа оноулашхандыла

Къабарты-Малкъарны Правительствосуну кезиулю кенгешин аны башчысы Мусукланы Алий озгъан ыйыкъда байрым кюн бардыргъанды. Жыйылыуда бир ненча бегимни эмда буйрукъну проектлерин сюзгендиле эмда къабыл этгендиле. Аны ишине министерстволаны бла ведомстволаны эмда жер-жерли администрацияланы башчылары эмда келечилери къатышхан эдиле.

Кенгешде Къабарты-Малкъарны келир жылгъа эмда 2026-2027 жыллагъа социал-экономика жаны бла айнытыу  прогнозу къабыл этилгенди. Аны республиканы экономиканы айнытыу министри Рахайланы Борис туура этген эди. Кеси да эки тюрлюсю жарашдырылгъанын билдиргенди. Ол айтханыча, бар умутла толсала, быйыл битеулю регион продуктну (ВРП) ёлчеми 105 процентге кёбейип, 325,5 миллиард сомгъа жетерикди. Тергеуле этилген кезиуню ахырына ол, былтыргъы кёрюмдю бла тенглешдиргенде, 137,1 процентге ёсюп, 446,3 миллиард сом боллукъду. Анга промышленность, эл мюлк, къурулуш эмда сатыу-алыу бёлюмле асламыракъ себеплик этерикдиле.

Проектледен бири бла ведомствола аралы ишчи къауум къураргъа оноу этилгенди. Ол кеси да бизни регионда биринчи медицина болушлукъ бериуню игилендириу бла кюреширикди. Бу проект Россейни Президентини буйругъун толтурур умутда эмда РФ-ни Саулукъ сакълау министерствосуну методика оноуларына тийишлиликде жарашдырылгъанды.

Спорт бёлюмде къырал казна, бюджет эмда автоном учреждениялада уруннганланы иш хакъларын тёлеу системагъа тюрлениуле кийирилгендиле. Ала быйыл августдан башлап  быллай учрежденияланы ишчилерини айлыкъларын он процентге кётюрюлгени эмда тренер-преподавательлеге 4500 сом тенгли айлыкъ тёлеу тохташдырылгъаны ючюн этилгендиле.

«КъМР-де билим бериуню айнытыу» къырал программа да аз тюрленнгенди. Энди башчыланы юйретиу эмда сабий жамауат биригиуле бла байламлыкъла жюрютюу жаны бла кенгешчилерине ай сайын бешишер минг сом берилликди. Тёлеуню быйыл биринчи сентябрьден сора 201 педагог аллыкъды. Бу жумушха къыралны бюджетинден быйыл 5,2 миллион сом жиберилликди.

Кенгешде дагъыда жер-жерли самоуправление органла халкъла аралы эмда тыш экономика байламлыкъла жаны бла келишиулюклени къурау низамны тохташдыргъандыла. Бу проект федерал эмда регион законодательстволагъа тийишлиликде жарашдырылгъанды.

Инвестиция проектлеге кёз-къулакъ болуу низам да жангыртылгъанды. Анга жангы инвестициялы стандартланы, проектлени тамамлау амалланы излемлери киргендиле. Дагъыда КъМР-ни айнытыу Корпорацияны онглары эмда аны ишини къыйматын ачыкълагъан низам да тохташдырылгъандыла.