Интернетни кюню

Жыл сайын 30 сентябрьде Россейде Интернетни кюню белгиленеди. Бу байрам, тюзюн айтханда, халкъла аралы даражагъа энтта да чыкъмагъанды. Башхача айтханда, башха къыраллада анга жик-жиги бла бир кюнню тохташдырмагъандыла. Бизде уа ма бу айны ахыр кюнюне салгъандыла.

Россейде Интернетни кюнюн белгилерге оноу 1998 жылда Москвада IT Infoart Stars компаниядан чыкъгъан эди. Андан башха компаниялагъа эмда фирмалагъа письмо жиберип, ол кюнню белгилерге, «орус тилли интернетде хайырланыучуланы санын тергерге» чакъыргъандыла. Ол жазыугъа кёре, 1998 жылда бизни къыралда бир миллион адамны интернетге чыгъаргъа онглары бар эди. Биринчи байрамны да интернет бла жалчытхан компанияла, фирмала эмда информация агентствола къатышып белгилегендиле.

Бюгюнлюкде интернет хар бирибизни да жашауубузгъа сингнгенди. Mediascope компанияны тергеулерине кёре, былтыр аны россейли инсанланы 83 проценти хайырлана эди. Ол кеси да жыл санлары онекиден атлагъанланы (101,4 миллион адам) санагъанда. Халкъны асламысы социал сетьледе олтурады. Кёплери интернет адамны жашауун бек тюрлендиргенин, аны кесини да хатасындан эсе хайыры уллу болгъанын чертедиле.

Экспертле оюм этгенлерича, былтыр Интернетге жер башында 50 миллиарддан аслам устройство къошулуп эди. Тергеулеге кёре, 2041 жылгъа сетьле энтта да 500 кереге кенг боллукъдула.

Къабарты-Малкъарда уа Интернет 1998 жылда чыкъгъанды. Биринчи оборудованияны КъМКъУ-ну физика-математика бёлюмюнде орнатхан эдиле. Ол а сетьге спутникге къошулуп чыгъа эди. Ол кезиуде вузда сегиз компьютер класс ишлей эди интернетге чыгъып. Алада уа жер башында энди таукел атлам этип башлагъан жангы амал бла кюн сайын къадар окъуучу шагъырейленип тургъанды.