Айтхылыкъ алимни хурметине – эсгериу къанга

РАН-ны академиги Энейланы Тимурну жюзжыллыгъын «Антарес» билим бериу арада белгилегендиле. Айтхылыкъ алимге аталып, анда эсгериу къанга орнатылгъанды.

Энейланы Тимур космосха учхан аппаратланы жарашдырыугъа уллу къошумчулукъ этгенди. Аны тергеулери бла Жерни биринчи жалгъан спутнигин аламгъа жибергенде, адам космосха биринчи кере учханында хайырланылгъандыла. Тимур Магометович аппаратны тёгерек ишлегенде ол ауурлукълагъа, уллу иссиликге да чыдарыгъын тохташдыргъанды. Аны космосну айнытыуну юсюнден илмугъа салгъан къыйынына бийик багъа биче, республиканы жарыкъландырыу эм илму министри Анзор Езаов ол табийгъатны, къудуретни сакълаугъа да сакъ болгъанын эсгертгенди. «Тимур Магометович Байкалны кирлениуден сакълаугъа, шимал сууланы къыбылагъа бурууну юсюнден проектге къажау кюрешге да тири къатышханды. Байрам кюн «Антаресде» физикадан устазла, «Космос бла жулдузланы», «Космосну физикасыны» юслеринден сейир дерсле бергендиле, «Кюнлю шахарда» уа закийге жоралап тюбешиу бардырылгъанды», - деп билдиргенди министр.

 «Кюнлю шахар» араны башчысы Джаппуланы Тамара айтханыча уа, анда «Робототехника» деген смена ачылгъанды. Анда сабийле робототехника эришиулени регион кезиуюне хазырланырыкъдыла, ол а Нальчикде октябрьни ахырында боллукъду.