Табийгъатны бай саугъалары

Къабарты-Малкъар гуманитар-техникалы колледжде бу кюнледе школгъа дери билим берген учрежденияланы ишчилерин хазырлагъан бёлюмню студентлери кеслери хазырлагъан «Кюзню оюулары» деге аламат кёрмюч хазырлагъандыла.

 Кюз арты кеси жюреклени умутладан, сагъышладан, тасха оюмладан толтургъан кезиудю. Ангылагъаннга бла билгеннге табийгъат бу сезимлени жашаугъа келтири ючюн керекли материалдан байды. Колледжни юйретиучюле хазырлагъан бёлюмюню студентлери хар кёзге кёрюннген затдан искусствону унутулмаз бир юзюгюн къураргъа боллугъун айтадыла. Жаланда бираз адамны билген къол ызы керек болады. Табийгъат материал бла ишлеу сабийге тереклени, битимлени, къанатлыланы, жаныуарланы юслеринден да ангылатыуну сейир эм тынч этерге болушады. Къудуретни ариулугъун бла байлыгъын кёргюзте, алагъа заран бермей, тёлюледен тёлюлеге ётдюрюр ючюн, сакъ болургъа кереклисин ангылатадыла.

27 сентябрьде, юйретиучюню бла битеу школгъа дери билим берген учрежденияларыны ишчилерини  кюнюнде колледжни фахмулу, жетишимли устазы Шауаланы Шура Алиевнаны башчылыгъы бла, студентле «Кюзню оюулары» деген ат бла табийгъатны бай саугъаларындан кёрмюч хазырлагъандыла. Мында энчи эм коллектив бла бирге этилген ишле бардыла. Ала барысы да табийгъат  материалладан, тюрлю-тюрлю техникаланы бла  амалланы хайырланып, жарашдырылгъандыла.  Хар иш кесича энчиди, аламатды. Аны толтура туруп, студентни ич дуниясы, жашаугъа кёз къарамы, халы, сезимлери да кёчедиле къол ишине. Андан сора, жаш устазланы креатив халда сагъыш эте билгенлери бек къууандырады. Фахмулу студентле ишлерин жарата туруп, кёгетлени бла жемишлени, мирзеуню, къуругъан чапыракъланы, пластикни, гипсни, дагъыда кёп башха материалны хайырланнгандыла.  Кёрмючге къараргъа келгенле бла колледжни къонакълары бийик багъа биче, хар ишни энчи черте, аны терен философия ызы болгъанын белгилегендиле. Ишлени хазырлагъан устала да хайырланнган материалларыны бла амалларыны юсюнден зауукълу хапарлагъандыла. Бу аламат чыгъармачылыкъ ишлеге къатышхан окъуучулагъа махтау, ыспас этилгенди.