Шахарны тапландырыу жаны бла тийишли мадарла этиледиле

КъМР-ни Башчысы Казбек Коков республиканы транспорт эм жол мюлк министри Аслан Дышеков эм Нальчик шахар округну администрациясыны башчысы Таймураз Ахохов бла тюбешгенди. Аны кезиуюнде сёз республиканы ара шахарыны жолларына тынгылы ремонт этиуню эм тапландырыуну юсюнден баргъанды. Бюгюнлюкде  алгъадан къабыл этилген планнга кёре, Нальчикде кёп фатарлы юйлени жангыртыу эм жамауат аслам айланнган жерлени игилендириу ишле къыстау бардырыладыла. Арт жылла да битеу да 300 арбаз эм 22 жамауат жер тапландырылгъанды. Аны юсюнден КъМР-ни Башчысыны бла Правительствосуну пресс-службасы билдиреди.

 «Артыкъ уллу эс магъаналы социал мекямла орналгъан жерлеге буруллукъду, аланы асламысыны къурулушлары башалгъанды, бир къауумун жылны аягъына битдирирге керекбиз. Буз мекям, Жаш тёлю чыгъармачылыкъ мекям, биринчи поликлиниканы жангы мекямы эм башха объектле энчи эсепдедиле. Ала орналгъан жерледе тротуарла, жашил тийреле, адамла солурча жерле боллукъдула, орамлада кече чыракъла жанарча эм машиналаны салырча онгла къураллыкъдыла», - деп чертгенди республиканы оноучусу.

 «Къоркъуусуз эм тынгылы жолла» деген миллет проектни чеклеринде Нальчикни жоллары тохташдырылгъан мардалагъа келишдирилликдиле. Бюгюнлюкге жолланы асламысы тёрт машина бир ыздан жюрюрча этилгендиле, къошакъ халда транспорт эркин айланырча амалла къуралгъандыла, кёп жерледе ингирде чыракъла жанарча болгъанды. Дагъыда ремонт этиле тургъан орамлада адамла жюрюрча жолчукъла, тапландырыу бла байламлы башха амалла да этиледиле.

Аны бла бирге, Нальчик терк айнып тебирегенди, аны орамларында машинала аслам болгъандыла, ол себепден шахарны тёгереги бла айланып чыкъгъан автомобиль жолну проекти этилгенди. Шахар парк да тапландырылады, тротуарла эм велосипедле бла айланырча жолчукъла къураладыла, деп айтылады билдириуде.