Шимал Кавказда биринчи зоопарк

1927 жылда Ленинчи окъуу шахарчыкъда, билим бергенде хайыры боллукъду деген умутда жаныуарла тутхан гитче мюйюш къурайдыла. Келир жылда аны Пионерлени юйюне берип, Долинск таба кёчюредиле, шёндю шахарны зоопаркы тургъан жерге. КъМР-ни Архив службасындан билдиргенлерине кёре, алайы аз-аздан жаныуарладан эмда къанатлыладан толу болуп тебирейди. Школчула, сабийле да ары келип, бизни жерлерибизде къаллай жаныуарла жашагъанлары бла шагъырейленирге онг табадыла.

Немис-фашист душманла Къабарты-Малкъарны бийлеген кезиуде анда кечиннген жаныуарланы бир кесеги къырылгъан эдиле. Башхалары уа уллу кёллю болмагъан адамланы хайырындан сау къалгъандыла. Уллу Ата журт уруш бошалгъандан сора,  Пионерлени юйюнде ол мюйюш жангыдан ачылады.

Кёп жылланы ичинде ол зоопарк халда ишлеп тургъанды. Курорт тийреде орналгъаны ючюн ары шахарчыла, къонакъла да бара эдиле. КъМАССР-ны Министрлерини Совети 1959 жылда алайда зоопарк къураргъа, кесин да агъач мюлкню биригиуюне берирге оноу этеди. «Шимал Кавказда зоопарк маталлы жер жаланда Нальчикде болгъанын эсге алыргъа тийишлиди. Пионерлени юйюнде «Сау мюйюшню» артыкъ къоранчсыз тынгылы зоопаркга тюрлендирирге боллукъду», - деп айтыла эди бегимде.

Алай бла 1966 жылда 20 сентябрьде жангы зоопарк ачылгъанды. Ол жети гектарны ала эди, ичинде уа 36 кийик жаныуар эмда къанатлы жашай эдиле.

Бюгюнлюкде Нальчикни зоопаркында жюз бла жыйырмадан артыкъ жаныуар эмда къанатлы жашайды. Кёплери Къызыл китапха тюшгендиле. Барына да тап болум къуралгъанды анда.